Si rive ae autodeterminazion des feminis dome traviers di istruzion e educazion

La volte stade o vin considerât che lis politichis di contigniment demografic che a son stadis metudis in vore in Cine e Indie a àn vût un risultât positîf in tiermins di riduzion dal impat demografic (la popolazion cinese e tache a stabilizâsi e chê indiane i larà daûr), ma di chê altre bande a son stadis imponudis cu la fuarce, invezit di invistî su la istruzion. Chest al à puartât a problemis tant che abort seletîf e abandon di frutinis piçulis, stant che lis fameis a sielzevin dispès di tignî un fi invezit che une fie. Si è cussì determinât un scompens tra oms e feminis, prin di dut pal numar no ecuilibrât dai doi gjenars inte popolazion, ma ancje pe incressite des violencis, massime di bande di oms zelôs. Par cont gno, i “esperiments” fats in Cine e Indie a mostrin che la uniche strade percoribile par rivâ a une planificazion demografiche e je la educazion. Si à di fat viodût che “lis feminis indianis che a rivin inte scuele superiôr a àn in medie 1,9 fîs ognidune. Chês che si laurein a ‘nd àn 1,6. Il tas di natalitât des feminis cence istruzion al è di 6,0 fîs ognidune”, come che al conte Alan Weisman in “Conto alla rovescia. Quanto ancora potremo resistere?”, un so libri dal 2014. Dâ aes feminis il podê di istruîsi e di decidi cuant e se fâ fruts al è un dai ponts fondamentâi dal feminisim mondiâl. Di simpri, la femine e je stade viodude tant che une proprietât, prin dal pari e dopo dal so om, e tant che une machine par fâ fruts prin che une creature umane. Il moviment feminist al à cirût e al cîr ancjemò di rivâ ae paritât di dirits e si pues dî che lis robis a son in part cambiadis, ma no par dut il mont. Pensait par esempli che vuê 123 milions di fruts no frecuentin la scuele elementâr, e la maiorance di lôr e je componude di frutis. Chest disecuilibri si pues cjatâ fûr tal fat che diviersis fameis a tindin a mandâ a scuele i fîs masclis pluitost che lis feminis. A restin ancje causis gjenerâls plui comunis che a impedissin la istruzion a ducj i doi i ses: la puaretât, la inacessibilitât des scuelis, la voie dai gjenitôrs di mandâ i fruts a vore za di piçui par judâ la famee e la mancjance di une istruzion di base di cualitât (come che al dîs l’UNICEF). ❚