La Begarole dai Urâi (Strix uralensis) e je un uciel di rapine noturni cuntune grande distribuzion che e va de Scandinavie, passant pe Russie e pa la Asie, fin al Gjapon. A son ancje altris popolazions, par esempli te Europe centrâl e sudorientâl (Strix uralensis macroura), che a son consideradis relits glaciâi, ven a stâi che si son origjinadis dai individuis che a àn scugnût sbassâsi di latitudin par vie de glace che e rivave a latitudins simpri plui bassis, par colpe dal cambiament dal clime leât aes glaciazions. Po dopo, cuant che la glace si è ritirade, no àn bandonât dal dut lis zonis dulà che a jerin rivadis.
◆ In Italie, la Begarole dai Urâi e à tacât a nidiâ tai agns ’90 dal secul passât, intes Vals dal Nadison. Intal stes periodi, e je stade cjatade ancje intal Bosc dal Cansei.
Tai ultins 20 agns, l’autôr al à condusût studis par cjatâ la presince di popolazions in altris zonis, par verificâ la nidificazion, par definî l’areâl talian e la sô evoluzion intal timp, par individuâ i aspiets leâts ae conservazion. Cun di plui, fra il 2013 e il 2018 a son stadis cjapadis in considerazion trê areis cul obietîf di otignî valôrs di densitât tal periodi riprodutîf. Lis trê areis, che a son rapresentativis dai habitats dulà che e vîf la specie a Sud des Alps, si cjatin ae estremitât nordorientâl dal Stât, ai confins cun Austrie e Slovenie in Comun di Tarvis, fra il Jôf dal Montâs, il Jôf Fuart e la Mont Cjanine in Comun di Scluse e in piçule part in chel di Tarvis, e intes Prealps Cjargnelis intai Comuns di Verzegnis, Trasaghis e in piçule part in chel di Vît.
◆ Tal 2001 al è stât un contat te Val di Ucee, ma il prin nucli di riprodutôrs che al è stât cjatât di là dai doi che si cognossevin bielzà, al è stât – intal 2004 – tes Prealps dal Arzin dulà che, te val dal Palâr, l’an dopo e je stade aciertade la riproduzion. Tal stes timp, a conferme de espansion viers de zone alpine, la Begarole dai Urâi e je stade individuade sui Monts Duron e Cuar, pôc parsore di Tumieç.
◆ Fra la seconde metât de prime desene di chest secul e i prins agns de seconde, a son stadis altris segnalazions che a àn confermade la presince in areis cognossudis e che a àn provât la espansion in altris: Alte Val dal Tiliment (Comuns di For Disore e For Disot), Prealps Juliis (par esempli tal Cjanâl di Resie), Valcjanâl (Val Saisare, Val dal Riu dai Salets). Tal 2011 è stade verificade la prime nidificazion in zone alpine taliane (Val de Bût, Alps Cjargnelis).
Subit dopo, la Begarole dai Urâi e je stade cjatade intes zonis fra la Mont di Verzegnis e la Plombade, fra i Plans dal Montâs e la aree di Nevee, e fra lis Caravanchis e il grup dal Mangart. Tal 2013, la nidificazion e je stade aciertade tal Cjanâl di Resie e, pe prime volte intes Alps Juliis, tal 2014 inte zone dai lâts di Fusinis.
◆ Chestis indagjins a àn permetût di verificâ ce che si ripuarte culì sot. La specie, dal so prin insediament si è espandude massime bande soreli a mont, sul imprin in areis prealpinis e dopo ancje in zonis alpinis.
• Cumò la Begarole dai Urâi si cjate, in mût iregolâr, massime dilunc dal confin cu la Slovenie, de Valcjanâl aes Vals dal Nadison (Caravanchis, Alps e Prealps Juliis), ma si cognossin altris popolazions.
• L’areâl talian al insist in pratiche dome in Friûl, cun dome une piçule aree in Venit (Bosc dal Cansei e, forsit, Cjadovri).
• Lis zonis dulà che la nidificazion e je cierte o probabile a son 7 (Vals dal Nadison; Bosc dal Cansei; Prealps dal Arzin; Alps Cjargnelis; Prealps Juliis; Alte Val dal Tiliment; Valcjanâl).
• La popolazion taliane e je stimade in 30-50 cubiis.
• Lis cubiis teritoriâls a son stadis cjatadis di 600 a 1700 m s.l.m.. in boscs dulà che lis speciis di arbui plui comuns a son il faiâr (Fagus sylvatica) e il peç (Picea abies).
• La espansion dal areâl e je stade favoride dal invecjament gjeneralizât dai boscs e dal abandon di grancj setôrs di chei: la presince di arbui muarts, vecjos e/o cun busis, e di plantis rotis, e favorìs la specie. Invezit la lôr mancjance in boscs sfrutâts dulà che a son rârs ancje i vecjos nîts dai uciei di rapine diurnis, che la Begarole e pues doprâ, e à duncje tant che risultât il sbassâsi dal sucès riprodutîf.
• Lis densitâts otignudis intes trê areis (comprendudis fra 1,6 e 1,9 teritoris/10 Km2) a son dentri dal grant interval che si rigjave de bibliografie di setôr.
Tal cors dai vincj agns di studis, a son saltadis fûr diviersis criticitâts in merit ae conservazion, validis ancje par altris speciis, che a incidin su dut l’ecosisteme forestâl e che a puedin jessi sintetizadis come che si lei ca sot.
• Mancjance cuasi totâl, tes leçs e tai regolaments su lis utilizazions forestâls, di considerazion de esistence di altris specis vegjetâls e animâls in plui di chês di interès dome forestâl e di economie “svelte”.
• Ancje cuant che tes leçs e tai regolaments si trate di biodiversitât, chê e je cuasi simpri subordenade a aspiets di caratar economic e burocratic.
• Scjarse o nissune cognossince, o interès personâl (sensu lato) di bande di diviers di chei che a scrivin o che aplichin leçs e regolaments.
• Superficialitât che cun chê dispès si tratin i aspiets “ambientâi”.
◆ Dut chest al compuarte che la presince di speciis tant che la Begarole dai Urâi, no dome no je cognossude, ma e devente motîf di interès eventuâl dome pe divignince stimade esotiche par vie dal non (come plui voltis verificât dal autôr), ma no motîf di interès pe conservazion de specie e dal habitat dulà che e vîf. Al sarès invezit fondamentâl preservâ grandis areis cun habitat intat e no framentât. Cheste prevision si scuintre cu la disponibilitât di bêçs publics pe realizazions di oparis (par esempli, stradis forestâls) che a incidin in maniere pesante ancje su zonis che ancjemò cumò a mantegnin un bon grât di naturalitât, e l’impat di chês in fase progjetuâl preliminâr al è valutât nul o trascurabil, ancje in mancjance di dâts necessaris par une valutazion corete o in presince di elements ostatîfs evidents.
◆ In plui di chest, la viabilitât forestâl, motivade di esigjencis silvicolturâls, e devente dispès vie di passaç di mieç motorizâts no autorizâts, o autorizâts pai motîfs plui diviers, ancje par manifestazions motoristichis in plen periodi riprodutîf dai animâi.❚
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +