Seste edizion dal premi bienâl di poesie “Tracanelli”: la consegne pai 30 di Setembar

Al è jessût il bant di concors pe VI edizion dal premi bienâl di poesie Nelso Tracanelli, organizât dal Comun di Sant Michêl sul Tiliment, cul patrocini di Associazion “La Bassa”, Societât Filologjiche Furlane, EFASCE, CUF di Udin, “Centro Studi Paolo Pasolini”, CIRF, Provinciis di Vignesie, Pordenon e Udin, Regjon Venit e Friûl-Vignesie Julie.
Il premi, che al intint memoreâ e promovi la figure e la opare di Nelso Tracanelli (1934-2002), al à dentri une sezion in lenghe furlane (di cualsisei variante locâl) e une in lenghe taliane.
Si pues partecipâ a dutis dôs lis sezions, li che i concorints a podaran presentâ no plui di trê poesiis che a vedin al massim 30 viers par ognidune. Lis composizions a varan di jessi ineditis.
Par dutis dôs lis sezions il prin premi al è di 1.000 euros, secont e tierç di 500 e 300 euros.
Par cui che al à voie di partecipâ, e je une cuote di 10 euros par spesis di segretarie e il tiermin al è ai 30 di Setembar dal 2015.
La premiazion si davuelzarà ai 20 di Dicembar.
Te ultime edizion dal 2013, il vincidôr de sezion furlane al è stât Antonio Cosimo De Biasio di Cordenons cu la poesie “A tìro sempre ario uvì de me”.
Par vê informazions o viodi il regolament complet, rivolzisi ae biblioteche comunâl “Nelso Tracanelli” di San Michêl sul Tiliment, vie Piave, n. 2, tel. 0431-50020 fax 0431-512980, direzion di pueste eletroniche biblioteca@comunesanmichele.it, o pûr viodi sul sît dal Comun: www.comunesanmichele.it
CUI JERIAL NELSO TRACANELLI
Mestri elementâr di Sant Michêl sul Tiliment, poete e scritôr, conseîr dal so Comun e de Filologjiche, tra i fondadôrs de Associazion “La Bassa”, al è stât un dai prins a movisi par fâ tornâ in Friûl il Mandament di Puart e in particolâr il so Comun di nassite, Sant Michêl. ❚
✒ Redazion