Sfuei Mensîl Furlan Indipendent
Archivi de Patrie

SCOMENCÂTS PAR FURLAN. Il Signor dai Anei

............


.
.

par cure di Pablo Gortan e Dree Venier
John Reuel Ronald Tolkien 
Il Signor dai Anei.
La compagnie dal Anel

Cjapitul 1. Un ghiringhel cetant spietât
Cuant che il siôr Bilbo Baggins, che al steve intal Borc dai Baggins, al fasè savê che in curt al varès festegjât il so 111m complean cuntun ghiringhel di lusso, ducj a Cja’ Hobbit a tacarin a fevelâ dal event cun gjonde e morbin. Bilbo al jere un sioron, ancje se un tic strambot, e par sessante agns al jere stât il babio de Contee, di in chê volte che i vignì il sen di sparî par tornâ dibot, cence visâ nissun. I tesaurs che al veve puartât cun se dai siei viaçs a jerin deventâts une liende popolâr, e ducj aromai a crodevin – ancje se i vecjos lu dinein – che la Culine dal Borc dai Baggins e fos plene di galariis jempladis di tesaurs. E se nancje chest al bastàs a stiçâ la so nomee, il so benstâ cussì indevant cui agns al jere sigurementri une reson di maravee. Il timp al coreve ma al someave che nol fasès nissun efiet sul sior Baggins. Cuant che al veve novante agns al pareve che a ‘nd ves cincuante. A novantenûf agns la int e scomençà a disi che si mantignive benon: ma a varessin fat miôr a disi che nol jere gambiât di un et. Cualchidun al scjassave il cjâf businant che al jere stât plui che fortunât inte vite; nol pareve di sigûr bon che cualchidun al podès, in viste, gjoldi di une zoventût cence limit e al stes timp – come che si diseve – ancje di une ricjece favolose.
«Al varà di paiâle,» a disevin, «No je une robe di sest, i vegnarà pûr fûr cualchi magagne!»
Ma fin li nissun fastidi; e il siôr Baggins al jere ancje gjenerôs in cuistion di monede, tant che la int i perdonave la sô matetât e la sô buine fortune. Cussì lui al podè mantignî simpri contats cui siei parincj (fate ecezion, naturalmentri, pai Sackville-Baggins) vantant un trop di inmagâts amiradôrs jenfri i siei compaesans des fameis plui puaris e malmetudis. E pûr nol veve nissun grant amì, fin cuant che cualchidun dai siei cusins plui zovins al tacà a cressi. Il plui grant di lôr, e il plui amât di Bilbo, al jere il zovin Frodo Baggins.
(voltât di Agnul Floramo)

________________________________________________
Il libri e l’autôr
Il Signôr dai Anei e je une opare monumentâl, ma dome une piçule frazion de intiere vore fantastiche dal autôr. I popui libars de Tiere di Mieç a àn di frontâ menace di Sauron, Signôr dai esercits dal mâl. Grancj vuerîrs e erois si dan dongje par fâi cuintri, ma al è Frodo, un piçul hobbit, che al salvarà il mont. John Reuel Ronald Tolkien nol fo dome scritôr, ma ancje filolic di innomine pe universitât di Oxford, passionât des lenghis e des epichis dai popui de Europe Setentrionâl. L’amôr pe femine, Edith Bratt, al nassè za di fantats; su la lôr tombe a son ancje i nons di doi siei personaçs, Beren e Luthien, un uman e un elfe imortâl, che a frontin mil pericui par podê realizâ il lôr amôr.
______________________________________________________
Il tradutôr
Agnul Floramo al è un insegnant e studiôs di storie e leterature, diretôr sientific de Biblioteca Guarneriana di Sant Denêl; autôr di plusôrs volums e saçs là che al scrusigne i rivocs de storie par intivânt corispondencis inspietadis, si interesse in particolâr de Ete di Mieç e de Europe Orientâl.
Par La Patrie dal Friûl al à tignût lis rubrichis Cuintristorie dal Nûfcent, Grignei di Storie, Siums di Storie, Il Personaç Storic, scorsadis tun passât lontan e resint che nus insegnin di dulà che o vignìn, e Cuintristorie de Prime Vuere Mondiâl, che chest an e je deventade un libri.
Tal mont de narative, al à publicât Balkan Circus (2013), Guarneriana Segreta (2015), L’osteria dei passi perduti (2017).

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +