La diversitât linguistiche e je un valôr, un dirit e une oportunitât pe Europe e lis cundizions de garanzie dai dirits linguistics e de tutele des minorancis a son il spieli de situazion gjenerâl dal procès di integrazion continentâl e des istituzions europeanis. Lu àn tornât a marcâ cun determinazion i rapresentants di sù par jù centecincuante associazions, istituzions e altris entitâts espression di cuarantecinc comunitâts minorizadis presintis in vincjecuatri stâts che a fasin part de ELEN (European Language Equality Network – Rêt Europeane pe Avualiance des Lenghis), che si àn dât dongje ai 10 e ai 11 di Novembar a Valencia pe assemblee gjenerâl di chê organizazion.
L’incuintri si à davuelt tal Retorât de Universitât e tal centri Octubre, che e je la cjase de organizazion Acció Cultural del País Valencià (ACPV), e al è stât siôr di contignûts. La atenzion e je stade pontade su diviersis cusitions, a tacâ de situazion in Catalogne. Cun di fat, cualchi ore prime che il centri di Barcelone al tornàs a jemplâsi di int (almancul 750mil di lôr), in place par protestâ cuintri de detenzion «preventive» di vot components dal guvier catalan – il vicepresident Oriol Junqueras e i ministris Raül Romeva, Joaquim Forn, Dolors Bassa, Carles Mundó, Jordi Turull, Josep Rull and Meritxel Borràs – e dai «doi Jordis», ven a dî i leaders de Assemblea Nacional Catalana (ANC), Jordi Sánchez, e di Ómnium Cultural, Jordi Cuixart, ancje la assemblee gjenerâl de ELEN si à esprimude sul argoment.
In particolâr a son stadis presentadis dôs risoluzions. La prime, fate indenant de organizazion catalane Plataforma per la Llengua, e domande la liberazion dai presonîrs e l’intervent de Union Europeane (UE) par che e vegni metude adun une inchieste imparziâl e autorevule in stât di fâ clarece su lis violencis che a son stadis te zornade dal Prin di Otubar stât e di fâ justizie cuintri des violazions dai dirits dal om metudis in vore de bande dal Stât spagnûl. La seconde, sometude de bande dai «parons di cjase» de ACPV, e fâs indenant chê stesse domande di liberazion dai presonîrs dongje dal invît pe vierzidure di un dialic tra il guvier spagnûl e chel catalan. Dutis dôs a son stadis fatis buinis ae unanimitât e mandadis aes istituzions de UE e al guvier di Madrid.
La assemblee e à fat bogns ancje altris documents, a tacâ di chel proponût de galiziane A Mesa pola Normalización Lingüística in cont dal inviament concret de bande dal guvier e dal parlament de Galizie de iniziative legjislative di iniziative popolâr a pro de garanzie dai dirits linguistics in cjamp socioeconomic che e je stade presentade cun passe 28mil firmis ma che pal moment e je ancjemò ferme.
Vie pai doi dîs di incuintri si à fevelât ancje de Cjarte europeane des lenghis regjonâls o minoritariis e dal fat che il Stât talian, dopo vêle firmade disesiet agns indaûr, nol à ancjemò rivât adore a ratificâle, e dal Babel Film Festival, la rassegne dedicade ae diversitât linguistiche te produzion audiovisive inmaneade in Sardegne che e je partner di Suns Europe. Tra i tancj temis frontâts a jerin ancje chel dai efiets dal Brexit su lis lenghis celtichis dal Ream Unît, cuntun voli particolâr pal galês, e chel dal rapuart tra lenghis minorizadis e tecnologjiis, cu la presentazion dal Digital Language Diversity Project.
La rêt ELEN, che e je stade metude adun tal 2011 cjapant sù la ereditât dal Ufici european pes lenghis mancul dopradis (EBLUL), e je ricognossude tant che interlocutôr de bande dal Parlament European, dal Consei de Europe, de ONU e de UNESCO. ❚
di Marco Stolfo
