Il gjornalut di Gjovanin Burascje
di Luigi Bertelli (Vamba)
Ve ca. O ai volût copiâ chi ta chest gno gjornalut il sfueut dal calendari di vuê, li che e je segnade la jentrade des trupis talianis a Rome, e che e je ancje la dì ch’o soi nassût jo, come che jo lu ai scrit sot, di mût che i amîs che a vegnin a cjase si visin di fâmi il regâl.
Ve ca intant la note dai regâi vûts fin cumò:
1. Une biele rivoltele di trai che mi à dât il pai;
2. Un vistît a cuadrei che mi à dât mê sûr Ade, ma par chel no bacili, parcè che nol è un bebel;
3. Une cjane di pescje di gale cul fîl e dut ce che al covente e che si smonte deventant un baston, che mi à dât me sûr Virgjinie, e chest al è il regâl che mi voleve, parcè che jo o deventi mat pe pescje;
4. Une buste par penis cun dut ce che al covente par scrivi, e cuntun lapis ros e blu sflandorôs, regalât di mê sûr Luise;
5. Chest gjornalut che mi à regalât la mame e che al è il miôr di dut.
Eh propit! La mê buine mame mi à fat propit un biele robe, dantmi chest gjornalut parcè che jo o scrivi i miei pinsîrs e chel che mi sucêt. Ce biel libri, cu la leadure verde e dutis lis pagjinis blancjis che no sai propit cemût ch’o fasarai a jemplâlis!
Al jere di tant ch’o bramavi di vê un gno gjornalut, dulà scrivi lis mes memoriis, compagn di chel che a àn lis mes sûrs Ade, Luise, Virgjinie che dutis lis seris prime di lâ tal jet, cui cjavei su lis spalis e disvistidis a mieç, a stan a scrivi par straoris.
No sai propit dulà ch’a cjatin tantis robis di scrivi, chês fantatis!
Jo, invezit, no sai plui ce dî; e alore cemût fasaraio a jemplâ dutis lis tôs pagjinis blancjis, cjâr il gno gjornalut? Mi judarai cul gno grant snait tal dissegnâ, e o fasarai chi il gno ritrat di cemût che o soi cumò, fats e finîts 9 agns.
_____________________________
Il libri e l’autôr
A son erois che in dì di vuê nus mancjin, e cualchi volte a stan sierâts in libris che nô no savìn nancje che a esistin. Un di chescj, dispès famôs dome pal senegjât cun Rita Pavone dal ’64, nol pues jessi che Giannino Stoppani, ven a stâi il Gian Burrasca creât di Vamba intun libri nuie di mancul che dal 1909, che – cun di plui – al somee che al sedi ispirât a une opare dal 1880 (A bad’s boy diary). Luigi Bertelli, cuntun sorenon robât al bufon di Ivanhoe, al à fat alc di plui che contâ lis baronadis di un birbant toscan di inizi secul. Gian Burrasca a ‘nt cumbine sì, di ducj i colôrs, ma insom al è bon, al lote pe veretât e cuintri lis injustiziis e, soredut, al met in lûs lis contradizions e lis ipocrisiis dai grancj. Un diari di discuvierzi, jessût a pontadis sul Giornalino della Domenica dal 1907, e no dome par fâsi cuatri ridadis. ❚
_______________________________
Il tradutôr
A voltâ l’incipit di un dai plui innomenâts “titui” par fruts de editorie taliane al è il nestri diretôr Dree Venier, autôr de I Gnognosaurs, i dinosauruts che a àn divertît plui di une gjenerazion di fruts furlans, rivâts al cuart libri (l’ultin al è The Best(iis)). Fumetist, grafic, ilustradôr, animadôr e gjornalist, al è diplomât in ilustrazion li dal IED di Milan. Intai agns ’90 al à realizât siglis televisivis, come chê di Paperissima. Al dissegne la vignete setemanâl su La Vita Cattolica dal 1999. Tal mont dai fumuts al à creât tancj altris personaçs: Capitan Cjargne, Little Meni, la Acuile de Patrie. Al è fra i fondadôrs de fanzine a fumuts Pipins. Par La Vita Cattolica, al à progjetât il gjornalut par fruts Alc&Cè. Intal 2003, al vierç il prin blog par furlan, Il Furlanist e cun Raffaele Serafini il blog Contecurte. ❚
✒ par cure di Raffaele Serafini e Dree Venier
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +