SCOMENCÂTS PAR FURLAN. Il delte di Venus

(traduzion di Sandri Di Suald)
Il venturîr ongjarês
Al jere un venturîr ongjarês di une bielece che inceave, infalibil atrat, gracie, la sgrimie di un ator industriât, culture, cognossince di cetantis lenghis, manieris aristocratichis. Cun di plui al jere gjeniâl tai maneçs, tal tirâsi fûr dai berdeis, lâ e vignî di ogni bande cence problemis.
Al viazave a la grande, cun cuindis baûi dai vistîts plui galandins, e cun doi grancj Danês. La sô ande autoritarie i veve fat vuadagnâ il sorenon di Baron. Il Baron si lu viodeve tai hotel plui di lus, a lis termis e a lis corsis dai cjavai, ator pal mont, tes escursions in Egjit, in viaçs tai deserts de Afriche.
Par ogni lûc al deventave il centri de atenzion des feminis. Tant che il plui versatil dai atôrs, al passave di un rûl a di chel altri par contentâ i guscj di ognidune. Al jere il balarin plui elegant, il plui vivarôs dai compagns di taule, il plui decjadent dai animadôrs tai tête-à-têtes; al podeve menâ une barcje, cjavalgjâ, vuidâ. Al cognosseve ogni citât tant che i ves vivût dute la sô vite. Al cognosseve ducj in societât. In curt, al jere indispensabil.
Co veve bisugne di monede al maridave une femine siore, i gjavave ogni sostance e la bandonave par lâ intun altri Paîs. La plui part des feminis no si ribelavin ni lu denunziavin a la pulizie. Lis pocis setemanis o mês che vevin vude la fortune di gjoldisal tant che om lassavin une sensazion ben plui fuarte dal shock di vê pierdût i lôr bêçs. Par un lamp a vevin cognossût ce che al jere il vivi cun grandis alis, il svualâ sore i cjâfs de mediocritât.
Lis puartave tant adalt, lis faseve sgurlâ cussì svelt tes sôs seriis di incjantaments che il so bandonâlis al veve inmò alc dal svuâl. Al parè scuasi naturâl: nissune compagne e varès podût tignî daûr ai siei grancj svuâi di acuile.
____________________
Il libri e l’autôr
La autore des cuindis contis di Il Delte di Venus (1977) e je la americane Anaïs Nin, considerade tra i scritôrs plui significatîfs dal gjenar erotic.
Par jê, la sessualitât e la creazion leterarie a jerin ancjetancj imprescj di esplorazion intime e di ricercje: la sô scriture si esprimeve soredut in forme autobiografiche, tai siei diaris (publicâts in version integrâl dopo la muart di jê dal so secont marît).
Tra i siei amants (cetantis personalitâts de art e de culture) al jere ancje il scritôr Henry Miller, che tai agns ‘40 le invidà a partecipâ a la creazion di contis erotichis su comission di un client, un “colezionist” anonim: dome tal 1977, dopo de sô muart, chescj scrits a forin rincurâts in Il Delte di Venus, opare origjinâl tal presentâ l’erotisim cuntun lengaç e un pont di viste gnûfs, feminins. ❚
___________________
Il tradutôr
Sandri Di Suald (Alessandro D’Osualdo) al è nassût a Sant Andrât dal Judri dal 1953. Al è l’inventôr di Tarvos, il prin fumut stampât dut par furlan. Ancje scritôr, al à vinçût intal 1985 il premi leterari San Simon cul romanç “zâl” Ah! La provincie, cul radiodrame Autoritrat al à vinçût il Premi Friûl di Radio Onde Furlane. Tra i siei personaçs a fumuts ancje Tzan le Valdotaine, trilengâl e fat pai valdostans, e la surîs Relè cun la cuâl al à realizât ancje un librut pe Guggenheim. Fra i altris soi libris Arrivano i longobardi!, Salvans!, Un insium di une gnot di mieç Istât de opare di William Shakespeare. Al à vût variis ricognossiments; tra i plui impuartants chel dal ministeri de Culture Austriache e il premi Alpe Adria par «l’aiuto alla comprensione tra i popoli». Al à esponût in mieze Europe. ❚
✒ par cure di Pablo Gortan e Dree Venier