Sardegne, la vergogne e je finide e la scuele e je tacade

«Say it loud: I’m black and I’m proud» al cjantave James Brown. Par sart chê voie di jessi se stes cun braùre e cun cussience – che par esempli par furlan agns indaûr e veve cjapât sù ancje la forme dal sproc antirazist «Nô o sin blancs ma la nestre lenghe e je nere» – no ven palesade dome cu la espression «Deo so sardu e mi inde bantu», ma ancje, almancul dal mês di Novembar dal 2021, cu la formule “Spaciada est sa bregungia” («La vergogne je finide»). Cheste e je la denominazion di un grup informâl di gjenitôrs che a son une vore atîfs a Casteddu (Cagliari) e dulintor, che si son dâts dongje cul intindiment di fâi cuintri ai prejudizis cuintri de lenghe sarde, in particolâr tal cjamp de istruzion, e par fâ alc di positîf e di concret a pro dal ricognossiment e de metude in vore dai dirits linguistics, propit tacant dal mont de scuele.
◆ Ai 5 di Setembar stâts il lôr ativisim al è rivât a jonzi un risultât impuartanton: l’inviâsi de prime sezion di asîl nît là che lis ativitâts educativis a vegnin fatis par sart, daûr dal metodi de imersion linguistiche. Cun di fat, cul tacâ dal gnûf an scolastic, tal asîl “Bambini in allegria” – une struture educative laiche metude adun intal istitût privât religjôs Sacro Cuore, inte capitâl de Sardegne – e cjate spazi cheste iniziative inovative e sperimentâl. Il progjet al prove a dâ une rispueste di sostance ae dibisugne sintude di diviers di lôr di podê tirâ sù i fruts intun contest plurilengâl là che ancje la lenghe sarde e vedi dut il spazi che i covente. Cun di plui, al pues deventâ un model di tornâ a meti in vore ancje inaltrò, dongje di une altre esperience similâr, chê da La Costura, la scuele pe infanzie par catalan metude adun a L’Alguer (Alghero) tal 2004 cu la poie dal Comun e de Generalitat de Catalogne (duncje cuntun jutori public e istituzionâl che almancul pal moment no si lu viôt tal câs di Casteddu).
◆ Il percors di preparazion al è tacât ae fin dal 2021 cui prins promotôrs de iniziative che a vevin clamât dongje altris gjenitôrs interessâts e in chel istès a vevin metût jù lis fondis de colaborazion cu lis educadoris dal asîl “Bambini in allegria”. L’invît a cjapâ part a un progjet pensât «cun chê difindi la lenghe sarde e di garantî aes frutis e fruts la pussibilitât di cognossi e doprâ la lenghe de lôr tiere» al à vût l’acet di diviersis fameis de zone e l’interès e il preseament di individuis e grups in dute la Sardegne, intant che inte Vierte passade al è tacât il percors di formazion des educadoris, che a cognossin il sart e che lu fevelin ma no vevin mai fat nuie di professionâl inte lenghe. Par sburtâ cheste azion cul sart lenghe veicolâr e cun dôs buinoris par setemane là che lis ativitâts a vignaran fatis par inglês, e je stade inviade une racuelte di donazions che ae fin dal mês di Avost e à puartât dongje passe 3.500 euros. Chei bêçs a saran bogns par garantî une indenitât specifiche pal personâl, par tirâ dongje materiâi didatics, par incressi la formazion des personis implicadis e par viodi di slungjâ l’orari des ativitâts fin 6 di sere, intant che pe frecuence lis fameis a pain la stesse cuote che a paiaressin in cualsisedi scuelute convenzionade cun ufierte educative dome par talian.
◆ La ativitât de sezion dal nît di “Spaciada est sa bregungia”, che pe sô gjestion aministrative si zove ancje di une altre associazion, la Movidì di Aristanis (Oristano), e je partide cun entusiasim e cun vincj di lôr – frutins e frutinis dai 10 ai 24 mês di etât – che a àn tacât, adun cu lis educadoris e cu lis lôr fameis, un percors positîf di educazion e di cressite, e salacor ancje di liberazion dai prejudizis e de vergogne. Une vergogne che e je finide cu la prime dì dal an scolastic 2022/2023. ❚