Sara Morocutti, zovine in politiche intun piçul paisut di mont

Sara Morocutti e je assessore al sport, associazions, events, ambient e inovazion dal Comun di Sudri. Chest al è l’ultin an di mandât (e je stade elete tal 2017, a 25 agns) e de sô esperience e conte: “In chescj agns o ai podût capî cemût che e funzione, e cemût dâ une man. Cuant che tu sês zovin al somee dut facil, ma dopo tu ti cjatis cuntune realtât dificile di gjestî: ancje daûr de robe plui semplice al è un lavôr burocratic incredibil. O pues dî che la gavete cumò le ai fate.” Sul fat di jessi femine in politiche intun piçul paisut di mont, Sara e pense che: “In Cjargne e je une mentalitât un grum sierade, baste viodi che su 28 sindics dome 3 a son feminis. No sai se al è un discors di mentalitât, se lis feminis no vuelin metisi in zûc, se al è plui dificil par nô a nivel familiâr rivâ a conciliâ lavôr, famee e dut, o se e somee inmò une incarghe di oms. Ciert, cu lis cuotis rose mi ven di dî che al è ancje brut che par tutelâ lis feminis a vedin scugnût fâ une leç par fânus lâ indevant! O pensi che se une persone e je brave, nol impuarte che e sedi om o femine. Baste che e sedi oneste, trasparinte e che e vedi ideis, la grinte di lâ indevant e lis capacitâts di fâ. Al vûl chel amôr pal teritori che ti judi a fâ.
◆ No mancjin i moments di sconfuart: jessi in mont e je une robe bielonone, però lis dificoltâts logjistichis a son tantis. Di là dal ambient politic, baste viodi ancje a nivel personâl che par studiâ tu scuegnis fâ il pendolâr, e par lâ ae universitât tu âs di fâ almancul 70 chilometris. – Chest Sara lu à provât di persone pe sô lauree magjistrâl in Filosofie, lauree trienâl in Letaris a orientament filosofic, e lauree in Talian – Par gno cont, un toc de universitât di Udin e varès di rivâ a Tumieç (bastarès un aspiet, un percors, un master in agrarie, in forestâl), par dâ une idee ai fruts che e je sul teritori. Une robe che i vin di pontâ nô zovins e je chê di rivâ a meti adun i paîs de Cjargne. Se no lin indevant cun cheste prospetive (almancul a nivel di valade) no lin di nissune bande. Il “fasìn di bessôi”, il sproc dal taramot, al jere une idee biele di rinassite. Nô o varessin di rilançâlu cun “fasìn insiemi”. Tumieç nol vîf cence i paisuts e i paisuts no vivin cence Tumieç. Ogni comun al à di viodi di chel dongje, fâ robis studiadis. Tai comuns a son tancj zovins cun voie di fâ grup e di confrontâsi: cun chescj elements, o vin metût adun il grup Cumò “Carnici uniti per la montagna”.
Altri teme impuartant al è chel de scuele: i numars a son chei che a son, però i comuns no si puedin robâ i numars un cun chel altri! I servizis a coventin ma no si pues acentrâ dut a val! Se jo o ai i servizis, mi stabilìs intal paîs e mi doi da fâ, se no o voi intun altri puest. Par sburtâ il turisim, o vin di vê biel, ogni cjanton al à di jessi curât. Sudri in chescj agns al à fat une vore, graciis a aministradôrs che tai agns a àn vût ideis e a àn savût viodi lontan. L’albierc difondût al à fat comedâ tantis cjasis, e di 30 agns incà si organizin ancje tantis fiestis. Cumò o fasìn cirche 6 fiestis ad an che a dan une man ancje aes piçulis ativitâts presintis, puartant une bocjade di aiar fresc.”
◆ Cuant che si domandi a Sara ce che e pense dal doman, e dîs: “Jo o pensi che la Cjargne e sedi biele però tocje rindile inmò plui biele in ogni cjanton. O vin un biel panorame, biei puescj, ma nus mancje un pocje di gracie. I fruts a àn bisugne di cressi intun ambient curât, tignût benon. Jo o crôt che lis scuelis dal teritori a varessin di dâ (des mediis insù) un spirt imprenditoriâl ai fruts, cu la idee che il lavôr si pues ancje creâ, no bisugne simpri lâ a cirilu. Un che al à studiât al pues ancje inventâ e creâ alc di so, jessî de scuele cu lis competencis par meti sù une piçule imprese. Cumò a son nassudis tantis aziendis agriculis, biologjichis. Nô o varessin di sburtâ in chel sens li. O vivìn intune regjon indulà che al è il tas plui alt di biodiversitât di Europe: dut chest mont achì al sarès di valorizâ!”
◆ Chescj valôrs, dutune cul amôr par cheste tiere di Cjargne, Sara e cîr di trasmetiju ancje ai fruts des scuelis, che in chescj agns le viodin impegnade a insegnâ. ❚