Sfuei Mensîl Furlan Indipendent
Archivi de Patrie

L’om che al fevele ai claps

Dree Venier
Gabriele Meneguzzi, l’ecuilibrist dai claps

Cuatri peraulis su la Land Art,
la Art de Tiere, cun Gabriele Meneguzzi,
artist e espert dal setôr

O ai incuintrât par câs lis sôs oparis balinant in internet e mi à inmagât. Gabriele Meneguzzi, 72 agns puartâts in maniere gaiarine, al è un “landartist”: par creâ oparis di art, al dopre dome i elements de nature, dai claps, ai ramaçs, al savalon. Land Art al vûl dî art de tiere. O ai scuviert che no dome lis oparis, ma ancje la storie de sô vite e je une vore artistiche…
__

Vincenzo Sponga (a çampe) e Gabriele Meneguzzi

Gabriele, cemût âstu tacât?
No ai tacât di zovin, di fat o vevi une cariere in bancje za ben inviade. A 37 agns mi àn proponût une promozion a diretôr cun trasferiment, e chest mi à dât il sburt a cambiâ vite. Une robe no facile, parcè che o vevi za famee. In chel stes periodi i àn proponût promozion e trasferiment al gno grant amì Vincenzo Sponga, publicitari di mistîr. Ancje lui al veve famee, ma o vin molât dut e cjapât sù une ativitât di florist, ancje se no si intindevin di rosis. In pôc timp il progjet si pues propit dî che al à menât ben cun une grande cressite dal zîr di afârs: o sin stâts i prins designers decoratîfs, a chei timps.

__
E la Land Art?
Intant che o lavoravin, jo o cirivi scuelis in Europe dulà imparâ la decorazion cu lis rosis, e o ’nd ai cjatade une in Svuizare, li che mi àn fat jentrâ dopo 2 agns di esams: no volevin un talian (al rît ndr). Ae fin dal cors, di 4 agns, la mê tesi e à vût la votazion plui alte di dute la Svuizare.
Dopo cualchi timp, un gno professôr mi à invidât a un event di Land Art, che no cognossevi. Mi soi puartât daûr Vincenzo e o sin stâts fulminâts di cheste art. Viodût il nestri lavôr, nus àn invidâts a partecipâ al plui impuartant event landartistic dal mont, a Grindelwald, prime tant che ospits, daûr de presentazion di un lavôr che al leve judicât, e l’an dopo lu vin vinçût tant che partecipants. E di li al è tacât dut.
__
E cuale ise la tô vision?
Il zûc. Zuiâ cu la nature par cognossile, esplorâle, rispietâle di plui. E mi plâs tant il fat che jê e torne a cjapâsi sù dut. Jo o lavori cui elements che o cjati, al naturâl. Se o ai di taiâ alc, o tai dulà che o sai che al torne a menâ. Il procès creatîf al previôt che ae fin cheste opare si disfi, e torni ae nature; e un zûc che o fâs al è tornâ timp dopo, cuant che dut si è sfantât, par doprâ chei elements in maniere divierse. Chest al covente par imparâ a pierdi il sens di possès tipic dal om e par gjoldi des robis cun libertât: e je une art efimare e par chel naturalistiche.

Cui fruts, a insegnâi a zuiâ cu la nature

__
Insiemi cun Vincenzo Sponga, o sês ancje promotôrs di Humus Park: nus fevelistu di chest progjet?
Al è un progjet nassût dopo il sucès di une mostre di fotografiis su la Land Art fate intal 2008 a Pordenon. Di chi la idee dal Comun di fâ une manifestazion di cheste art par valorizâ il Parc dal Seminari. Te prime edizion o invidarin 15 cubiis di artiscj forescj, tant par atirâ la atenzion. Daûr dal sucès vût vie pai agns, te ultime edizion, prime che al rivàs il Covid, o vin ospitât la iniziative in trê parcs cun 40 artiscj talians, 40 forescj, e ospits i fantats di 3 liceus e 5 academiis di art.
__
Cemût isal il panorame de Land Art in Friûl?
A son tantis robis interessantis e di nivel alt, ma no son publicizadis, no si fevele di lôr. Bisugnarès tacâ a contâlis, tai gjornâi e in cualchi servizi par television, dopo magari si scuvierzarès trop che a son bielis. Ma mi pâr che i nestris operadôrs de comunicazion a son un tic sierâts e cjadocs.
__
Tai incuintris internazionâi, âstu vût maniere di mostrâ il Friûl? Ce impression àno i forescj di chest teritori?
Lu viodin tes mês oparis e massime lu àn viodût tes lôr che a àn fat chenti: in tancj che o vin ospitât a son tornâts par cont lôr. Par un landartist il Friûl al è fantastic, cun tancj paisaçs pussibii intun teritori avonde strent. Cuant che invezit o voi ator, mi puarti la bandiere cu la acuile e i depliants che mi da un gno amì che al lavore in Regjon. Jo o soi convint che il Friûl al è un paradîs concentrât di bielece, ma i depliants no ju doi fûr a ducj: di chest bielece o soi zelôs, e un al à di dimostrâmi che se merte (al rît, ndr).
__
Parcè no si cognossial tant il Friûl, secont te?
Il Friûl al è dismenteât de Italie, che si vise di lui dome cuant che al è di molzi. Cjape il PNRR, no nus àn dât nuie, dome un progjet. Se o vin di rangjâsi di bessôi, alore, tant vâl jessi di bessôi, cence che nus molzin.
__
Âstu cualchi iniziative gnove che tu i tegnis di contânus?
Sì, un progjet pes scuelis pe infanzie cun fruts di 3-6 agns di puartâ su lis gravis. Lu ai za fat, e cuant che tu i disis ai frutins che claps e lens a son i zugatui di chê dì, sul imprin a restin scaturîts e dubiôs. Timp dôs oris, dôs!, e a son dal dut cjapâts de nature. Un progjet che mi plasarès fâ ancje cui grancj, par insegnâ a ducj a rispietâ la nature e no a distruzile. ❚

:::::::::::::::::::::::::::::::::::::::::::::::::::::::::::::::::::::::::::::::::::::::::

FOCUS. Ce che e je la Land Art

La Land Art e je une forme di art contemporanie nassude intai Stâts Unîts di Americhe tra il 1967 e il 1968, caraterizade dal intervent diret dal artist sul teritori naturâl, al principi in spazis incontaminâts e larcs tant che deserts, lâts salâts, pradariis, mâr, e v.i.
◆Lis oparis a àn dispès caratar efimar. E je une art praticade di tancj artiscj di dut il mont, fate di impostazions tant diferentis fra lôr e cun concezions e realizazions che a puedin jessi fin contrastantis; duncje no pues jessi calcolade un moviment artistic classic.
◆L’artist di Land Art al dopre i materiâi de tiere, naturâi: savalon, pieris, aghe, rams, fueis, pantan, e vie indevant.
◆La opare creade e ven sfantade dai agjents atmosferics e de fruie dal timp, e cussì, dispès, i unics testemonis des oparis a restin i materiâi fotografics o video. ❚

::::::::::::::::::::::::::::::::::::::::::::::::::::::::::::::::::::::::::::::::::::::::

LINK & LEAMS

Si pues lâ a viodi i lavôrs di Gabriele Meneguzzi e Vincenzo Sponga su
www.vivoverde.com e il progjet Humus Park li di
www.humuspark.it

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +