Ancje se la pandemie e à muardût ai sghirets dutis lis nestris aministrazions, in doi agns la Assemblee de Comunitât Linguistiche Furlane (Aclif) e je simpri plui in cressite. “Tal Lui dal 2019 a vevin aderît 118 Comuns, e vuê o sin 138”: peraule di Markus Maurmair, il president che al à lavorât par slargjâ chest orghin che al reste aromai la uniche manifestazion istituzionâl dal Friûl e se so specificitât. “Il sium a chest pont al è rivâ a vê ancje la adesion di Pordenon: e nol è dit che no si rivi a fâlu deventâ realtât”: la prospettive dal gnuf diretîf de Aclif e je chê di meti dongje dutis lis energjiis che si pues par frontâ i problemis vierts in teme di identitât.
◆ Un dai temis plui “cjalts” al è chel de presince dal furlan in Rai: za al timp dal president Navarria 80 sindics a vevin sburtât a fâ jentrâ in maniere plui penze la marilenghe inte programazion de Rai e a rinfuarçâ la redazion di Udin. “Intal ultin an la presince dal furlan in television e je cressude in gracie de gnove convenzion, ma no si à di fermâsi alì. Si po fâ di plui e soredut, no baste puartâ plui marilenghe intal palinsest, ma covente vê plui notiziis che a fevelin dal Friûl inte informazion regjonâl, che cumò e je une vore scuilibrade viers Triest. Al è di rimeti in staze cheste situazion parcè che la plui part di chei che a pain il canon al servizi public in cheste Regjon a son furlans”. Dut câs nol è facil vê risultâts parcè che la Rai intai ultins mês e à taiât il numar des edizions dai Tg regjonâi e il centralisim roman e milan-centric al sta tornant a cjapâ pît
◆ La Assemblee e à cirût di mendâ cheste situazion cuntun balcon informatîf su Telefriuli e cuntun rapuart simpr plui strent cui orghins di informazion par furlan come la “Patrie”, che l’an passât e à dedicât ogni mês une interviste ai sindics furlans e chest an e larà indevant a fâlu. E sul teme de identitât e continuarà a metisi a servizi de comunitât furlane. “Inte Vierte – al siere Maurmair – o tacarìn un cors di formazion pai dipendents dai Comuns e o metarìn a disposizion dai municipis il rispuindidôr automatic par furlan: un segnâl di atenzion pe dignitât di cheste lenghe e pai citadins che a son di marilenghe furlane”.
◆ Une atenzion particolâr e lares dade ae cuestin da ricognossiment de comunitât furlane ancje di bande dal Parlament: “in timp di revision de leç eletorâl il Stât talian nol po no inacuarzisi di une component linguistiche di passe 600 mîl citadins che a varessin di viodi tutelade la lôr rapresentance”. Ancje parcè che il numar di deputâts e senadôrs al larà in ancul, e il pericul che nol sedi plui nissun a difendi l’autonomie dal Friûl nol è cussì improbabil. ❚
Interviste al president Maurmair: “La azion de Assemblee par fâ contâ di plui il Friûl”
Redazion