Sfuei Mensîl Furlan Indipendent
Archivi de Patrie

SPECIÂL. Salam ongjarês, une storie di contâ par furlan

............

Une volte, in cuasi ducj i paîs rurâi furlans a jerin un o plui oms che, par vocazion, par passion o par mistîr, si intindevin di purcitarie e che se al coventave, par solit vie pal invier, a passavin une dì a purcitâ daprûf une famee. La storie nus conte che cuasi dutis lis fameis a vevin il purcit in cjase e cuant che al rivave il moment di copâlu, e jere ancje ocasion par fâ fieste.
Fi di cheste tradizion dute furlane al jere ancje un dai tancj oms che par vie de miserie al à cirût fortune ator pe Europe.
LIBARS DI SCUGNÎ LÂ_ Ae fin dal ‘800, daspò di vê cjatât lavôr tant che muredôr e pichepiere, “Barba Nane” di Budoie al partìs pe Ongjarie, dulà che vie pal invier al fâs par so cont cualchi salamut che, di cuant in cuant, al puarte in cantîr par mangjâ a misdì te ore di polse. I siei compagns di cantîr, cercjade e une vore preseade la specialitât furlane, a àn scomençât a domandâle simpri plui dispès, tant che “Barba Nane” une dì al à decidût di molâ il mistîr di muredôr par metisi a confezionâ e vendi i siei salams a timp plen. Par fâ chest, al implante a Budapest un piçul laboratori pe produzion di insacâts (fats sù cu la tecniche di Budoie) che al vent al minût, ma ancje cuntun cjar a fieris e marcjâts tant che ambulant.
Intal stes timp, di Frisanc (paîs a mont di Manià) a partissin pe diaspore trê fradis (i Dozzi): ancje se a vevin dome 12 e 15 agns, viodude la miserie di chei agns, a cjapin sac e râfs e a vadin a cirî fortune in Ongjarie. Une volte rivâts in lûc, Filip, Bepi e Davide a fasin cognossince cun “Barba Nane”.
LA CARIERE_ Passe cualchi an, Bepi si imberlìs de fie di Nane, e daspò vêle maridade, al devente un colaboradôr dal missêr te ativitât di purcitâr e di vendidôr.
Bepi, cul jutori dai fradis, in pôc timp al disvilupe il piçul laboratori, tant di fâlu deventâ une vere industrie cuntun stabiliment a Budapest (sot la sô direzion), un a Sinaia (sot la direzion di Filip) e doi, un a Soroksari e un a Viene in societât cuntun ciert Hertz (sot la direzion di Davide). Cun ben 150 dipendents dome tal stabiliment di Budapest, i trê frisanchins a rivin a vê il monopoli dai insacâts in ducj i Balcans e no dome li. Ogni an in autun, a fasin rivâ di Frisanc une trentine di lavoradôrs che dut l’invier a lavorin tai stabiliments Dozzi par tornâ, daspò in primevere, a Frisanc e dedicâsi di gnûf ai classics lavôrs di agriculture e di bosc. Tornant a cjase in Patrie, i operaris a puartavin dispès in cercje cualchi biel salamut ongjarês che, secontri la int di Frisanc, a difarence di chei furlans, a jerin une vore plui dûrs, fats sù cun cjar di purcit masanade fine e cetant plui pençs di ai e di speziis di chei nostrans.
PIÇUL IMPERI FURLAN_ Lis aziendis a vadin par dispiet e in chei agns i fradis Dozzi, in gracie de bontât dai lôr prodots e dai premis vinçûts, si fasin une piçule fortune e un piçul imperi, cence però mai dismenteâsi des lidrîs furlanis, tant che dispès a passin vulintîr lis feriis in Patrie, li dai parincj.
Po dopo e rive la vuere dal ’40-’45. Cu la invasion russe, i stabiliments a vegnin nazionalizâts e i Dozzi a son obleâts a scjampâ e a lassâ dut par tornâ in Patrie; i stabiliments di produzion dal salam a restin sot la direzion di un frisanchin, ex dipendent dai Dozzo, che – nomenât dal regjim tant che responsabil tecnic – al tornarà ancje lui in Patrie tal 1960.
Une altre storie di diaspore che nus lasse une sigurece: il famôs salam ongjarês come che lu cognossìn in dì di vuê, e glorie nazionâl de gastronomie ongjarese, al è fi de tradizion purcitarie e gastronomiche furlane, preseade e premiade ancje tal forest…
… come il Tocai!
Sandri Olivetto

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +