SPECIÂL. La tradizion inte scjate

Ancje la cusine furlane, cussì come dutis chês che a rivin de tradizion contadine, e je siore di savôrs e di guscj, di colôrs e di ingredients che a rivin drets de nature, e i plats che si preparin a son simpri un biel plasê pai vôi ma soredut pe bocje.
Chê furlane e je une tradizion di preparâ la mangjative che e rive di lontan, e tes pitancis nostranis nol è dificil cjatâ miscliçs cu lis tradizions culinariis forestis. Propit jessint une tradizion dal mangjâ che e rive di lontan, lis ricetis si passavin di mari in fie, di gjenerazion in gjenerazion, lassant ferme cul passâ dal timp la bielece e la bontât de magnocule.
UNE VOLTE_ Tes fameis di une volte, fin a cualchi an indaûr, il mangjâ al lu preparave la none, che e faseve di gustâ e di cene par dute la famee intant che i gjenitôrs a jerin a vore e i fruts a scuele o a zuiâ. Cussì tes fameis si mangjave ben e soredut dispès si gjoldeve des bontâts di une bocjade di robe buine e nostrane, la none par solit e veve il timp di stâ devant dal fûc e e podeve gjoldi di une lungje esperience di coghe. Benedete la none e la sô maniere di fâ di mangjâ!
Cul passâ dai agns però, e soredut cul mudâ de societât, ancje il mangjâ si è rangjât e al è lât incuintri aes gnovis pretesis des fameis. Tes cjasis cun fameis simpri mancul numerosis, e dispès dulà che no si cjate plui la none, il mangjâ nol è plui chel rituâl di une volte dulà che si sentavisi in taule ducj insieme, cumò si mangje di corse, magari simpri lis stessis robis, e salacor si mangje parfin robe za pronte inte scjate, dome di scjaldâ. Cheste usance di mangjâ robe in scjate e à tirât dentri ancje il Friûl e i plats tipics de cusine furlane aromai si comprin bielzà pronts tes buteghis.
IN INCRESSITE_ A dî il vêr di robis furlanis in scjate pal moment no ’nd è tantis, ma a sintî i produtôrs cul timp a saran simpri di plui, e il bon mangjâ fat in cjase come une volte al sarà simpri mancul presint intes fameis.
Il prin prodot tipic finît dentri dal carton e po vendût in grant e je dal sigûr la Gubane, che dai agns ’60 e je partide des valadis dal Nadison par concuistâ prime il Friûl, e po dopo cul timp ancje altris marcjâts.
Subit daûr la Polente, che di simpri e ven mangjade in Friûl ma che no je une pitance dal dut furlane, che daspò secui passât te cjalderie a boli cun calme sul spolert, dai prins agns ’70 e ven fate ancje in maniere industriâl e vendude dentri sacuts di plastiche.
PRIN, IL FRICO_ Ma il plat sovran de cusine furlane al è dal sigûr il Frico, chel bon miscliç di formadi e patatis che al fâs ingolosî ogni furlan de mont fin al mâr, il siôr de nestre tradizion culinarie che al fâs vignî la bielevoie a ducj, parfin lui al è finît inte scjate.
E no podeve che finî cussì, stant che ai furlans ur plâs e a mangjin une vore il frico, la industrie si è subit butade su di chel e i risultâts si son subit viodûts. La sodisfazion dai produtôrs di frico in scjate e je ben pandude, il prodot al plâs e al ven vendût cun numars di un ciert nivel, e soredut cuntune tindince des venditis che e je in cressite cul passâ dai agns.
Un altri goloset di cjase nestre e je la Bruade, che une volte e si le faseve e si le mangjave in cjase ma che sul finî de societât contadine furlane e je passade, puare ancje jê, dentri di un sacut di plastiche par podê rivâ su la taule dai golôs di chel râf cul colôr dal vin.
IL CJARSON_ Chescj a son i prodots che par solit si viodin su lis scansiis des buteghis, ma la grande sorprese che o ai scuviert scoltant un produtôr furlan e je chê dai Cjarsons.
De piçule Cjargne chest prodot tipic de nestre mont al è daûr a fâsi cognossi une vore lontan; il prodot al è une vore particolâr e la cuantitât che e ven vendude no je cuissà ce grande, ma la sodisfazion di viodi cheste paste plene di bontât che si compre ben a Milan o parfin sul marcjât forest e met al produtôr la voie di continuâ su cheste strade o magari di provâ a vendi ancje altris prodots tipics de nestre buine cusine furlane.
Par fortune no dut si vent in scjate, il plasê di fâ di mangjâ in cjase al è ancjemò biel presint, e se ogni tant no si rive a fâ di bessôi il Friûl al è plen di ristorants e agriturisims dulà cjatâ il plasê di une mangjade biele e gjenuine.
Luca Zoratti
______________________________________
La tasse sul frico
Come su dutis lis robis che a son in vendite ancje sul frico bisugne paiâ l’Iva, ma trop si aial di paiâ cheste tasse? La domande che un produtôr al à fat e à vude rispueste cheste Istât, cuant che il 11 dal mês di Lui e je stade buride fûr une Risoluzion de Agjenzie des tassis che e sisteme la cuistion. Il frico di patatis, jessint un prodot che al ven lavorât cun plusôr ingredients al paie une tasse dal 10 % par sei metût in vendite, impen che il frico fat dome cul formadi, jessint duncje dome un derivât dal lat, al paie une tasse dal 4 %.
I produtôrs ae fin a son ancje contents, stant che paiant di mancul a podin corezi il presit dal prodot che a vendin. E ancje i clients a podaressin cjatâ zovament sul gnûf presit.
L. Z.