RTS, pe television e pe radio i sarts a fasin di bessôi

Se lis istituzions e la concessionarie di servizi public a stentin a fâ dut ce che a varessin di fâ daûr des leçs par garantî i dirits linguistics e par promovi la lenghe sarde, in Sardegne al è cui che al cjape sù la iniziative par cont so cun chê di fâ alc di plui e alc di miôr. Al è il câs, tal cjamp dai media, de RTS (Radio Television Sarde), che e je stade screade juste il prin dal an.
◆ «Chê de RTS no je une novitât assolude – al sclarìs Tore Cubeddu, che al è il produtôr esecutîf de gnove emitente e che al è stât daûr di cheste iniziative fin dal principi – stant che e rapresente il disvilup di une percors inviât ancjemò tal 2014, cuant che o metevin adun EjaTv, la prime television par sart. In principi, sù par jù par trê agns e mieç, si podeve viodile dome in rêt. Dal 2018, otignint a paiament un canâl di une altre emitente, le vin puartade ancje sul digjitâl terestri, a disposizion des televisions di ducj i sarts».
◆ Chel passaç al vignive fat cul coinvolziment di altris sogjets: adun cun Eja Tv e cu la cjase di produzion Terra de Punt, che e veve batiât la web tv, si zontavin ancje un altri produtôr indipendent, Produzioni Sardegna, e la associazion Babel, che e je une des entitâts che a inmanein il Babel Film Festival, dedicât al cine intes lenghis minorizadis di dut il mont. «In chel moment e nasseve Sardegna 2 Eja Tv – al ricuarde Cubeddu – che e leve dilunc a presentâ prodots televisîfs in lenghe sarde e a jessi un pont di riferiment pal public che al veve plasê di cjalâ la television par sart e par ducj chei che a produsevin materiâi no dome inte lenghe proprie de Sardegne, ma ancje par catalan algherês o ben doprant chês altris varietâts (galurês, tabarchin e sassarês) che a completin il specific patrimoni linguistic de isule, ricognossût de Regjon».
◆ Al jere stât fat un altri pas indenant, ma a ‘nt coventave fat ancjemò un altri. «Cu la riorganizazion in vore dal digjitâl terestri – al zonte Cubeddu – tal 2021 o vin domandât di vê une frecuence nestre, e stant che no vin vude une rispueste positive o vin cjatât une altre soluzion: o vin slargjât ancjemò la nestre “aleance”, clamant dongje la associazion Torre Tonda di Sassari, titulâr de emitente no profit Sassari Tv, che e veve za la sô frecuence, e cussì e je nassude RTS»
◆ Tacant dal prin dal an, sul canâl 79 in Sardegne e in rêt par dut il mont ae direzion https://radiotelevisionesarda.tv/, RTS e mande in onde un palinsest complet cun documentaris, events e programs di ogni fate, tra culture, aprofondiments tematics e formats specifics pai plui piçui, in spiete di rivâ a fâ ancje informazion. «Tant che television comunitarie – al zonte Cubeddu – no vin l’oblic di fâ un tg cuotidian. Par cumò no rivaressin a fâlu, ma o sperìn in curt di tacâ almancul cuntun rotocalc setemanâl. Intant o lin dilunc cui materiâi che o vin e cun chei gnûfs che o varìn in curt, tra spetacui, oparis presentadis tal Babel Film Restival e fintremai un reality show…». Une alternative ae emitence privade locâl, che e fâs indenant une vision sclerotizade de lenghe de culture sarde, e a chê publiche, che e propon alc dome la domenie a buinore.
◆ Des peraulis di Tore Cubeddu al salte fûr a clâr chel che al è il l’impat di RTS, cun dodis di lôr a vore za dai timps di Eja Tv, e chê che e je la vision strategjiche che i sta daûr: «Vie par chest an o metarìn adun ancje la radio RTS, intant che il nestri obietîf al è chel di stramudâ Torre Tonda, che e je la proprietarie di RTS, intune fondazion vierte ae partecipazion di altris sogjets, cun chê di meti adun une sorte di network cu lis radios e cu lis television di altris comunitâts, a nivel statâl e a nivel european». ❚