Sfuei Mensîl Furlan Indipendent
Archivi de Patrie

Lis lenghis dai zovins: une gnove disfide par une scuele simpri plui plurilengâl

Serena Fogolini

“Inte dialetiche fra lis esigjencis de mondialitât e chês de localitât, si sparìs tant sierantsi tal propri scus che lassantsi gloti in maniere passive des gramulis inesorabilis dal grant ingranaç. La soluzion, utopistiche tant che si vûl ma uniche, e je chê di cjapâ simpri plui cussience dal nestri valôr e dal nestri dirit-dovê di partecipâ al destin dal mont in maniere paritarie o almancul dignitose. […] Chest al è pussibil dome se il procès di mondializazion al cjaparà sostance des tantis culturis e lenghis che a son un patrimoni straordenari de umanitât. Plui grande e sarà la diversitât e plui benefiche e benedete e sarà la unitât. E chest la scuele no pues no savêlu e tignîlu presint”.
◆ A son peraulis che a vegnin fûr tant che aghe di risultive, chês di pre Toni Beline, che za intal 2000, intune relazion pe direzion didatiche di Darte, nus veve metûts denant de disfide che la globalizazion e varès puartât intal mont e in Friûl.
◆ Une disfide inmò plui fuarte in dì di vuê, cemût che al à marcât il professôr Gabriele Zanello vie pal incuintri di presentazion de ultime fotografie linguistiche par cure dal grop di lavôr de Lavagne Plurilengâl, in ocasion de novesime zornade di formazion “Marilenghe&Mariscuele” (plui di un centenâr i docents iscrits, segn che la scuele furlane e je vivarose e sensibile).
◆ I risultâts dal scandai, di fat, a àn confermade la ricjece linguistiche intes scuelis secondariis di secont grât, cuntun plurilinguisim che al è un miscliç tra lenghis di minorance, di migrazion, ma ancje di lenghis forestis imparadis a lezion.
◆ Ae fotografie linguistiche pal an scolastic 2021-2022 a àn partecipât 7 istitûts superiôrs: Bearzi, Marinelli e Percoto di Udin, Magrini-Marchetti di Glemone, Linussio di Codroip, Manzini di San Denêl, Paschini-Linussio di Tumieç. In dut, a son stadis cjapadis dentri 55 classis (13 in plui dal an passât), par un totâl di 967 cuistionaris compilâts (229 in plui rispiet al an passât).
◆ Dai cuistionaris al è saltât fûr che il 42% des fameis al fevele dome une lenghe, biel che il rest al è bilengâl, se no ancje bon di doprâ plui lenghis.
◆ Il furlan al è fevelât intal 46% des fameis, cun pontis di massime a Tumieç (60%) e minime a Codroip (36%). Par solit, i parincj che a doprin di plui il furlan a son i nonos (il 42% dai students al fevele par furlan cui nonos e il 56% dai vons lu dopre cui nevôts), ma ancje i paris (lu dopre il 34% dai oms), a pet des maris (dome il 27%).
◆ Slargjant la voglade ae societât, si viôt cemût che il furlan al lassedi spazi al talian: cui zovins, dome il 26% dai grancj al fevele furlan e intes buteghis lu dopre il 19% dai marcjadants.
◆ Di bande lôr, ancje i fantats lu fevelin pôc tra di lôr (22% cui amîs e sù par jù il 12% cui compagns di classe).
◆ Se si va a viodi il timp libar, l’inglês al è une vore plui doprât, sedi intai social (15% cuintri il 9% dal furlan), che par viodi programs televisîfs (24% cuintri il 4%), navigâ te rêt (34% cuintri il 2%) e lei libris e fumuts (13% cuintri il 4%).
◆ E reste la conferme che la lenghe e ven cjapade sù di picininins, massime intes fassis 0-3, 3-6, 6-9 agns (sù par jù il 18% dal campion par ogni fasse; par cuintri, dome il 9% lu impare tra i 9 e i 12 agns, il 4% tra i 12 e i 15 agns).
Cualchidune des domandis dal scandai e pâr plui une provocazion, tant che il confront cun altris lenghis intes rêts internet e televisivis (dal rest, fin che no varìn pardabon une television par furlan, al è di bant lâ a cirî paragons), ma la fotografie e reste un imprest fondamentâl par meti in vuaite i students, ma soredut i adults su la impuartance di une vision e di un insegnament plurilengâl.
◆ Come che al diseve pre Toni: “Se nô o volìn fâ une operazion inteligjente, o vin di rivâ a armonizâ la dimension locâl, la dimension statâl e la dimension mondiâl. A son lis trê lenghis e culturis che ogni frut normâl al rive a paronâ cun estreme facilitât. Fâ sparî la prime lenghe, come che si sta fasint di simpri, e je une operazion di stupiditât e di pegrece, cun riflès negatîfs tant su la culture dal stât che su la culture e lenghe de comunitât mondiâl”. ❚

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +