Riforme sanitarie regjonâl, e va indevant la bataie

Si tache a jentrâ tal vîf ancje tra Tumieç, Glemone e Sant Denêl. La riforme sanitarie regjonâl che ca sù, plui che di ogni altre bande, e je stade criticade e combatude, e je daûr a movi i siei prins pas. Il diretôr gjenerâl de Aziende sanitarie n. 3 “Friûl de Alte-Culinâr-Friûl di Mieç” al conferme che, par esempli, tra i trê ospedâi si stan bielzà coordenant i miedis par podê impostâ il lavôr dai gnûfs reparts e meti in at i cambiament proviodûts de leç in fat di riconversions. O ricuardìn che se Tumieç e Sant Denêl a restaran ospedâi di rêt, Glemone e vignarà impegnade pal potenziament des riabilitazions dai lunc degjents, pe medisine pal sport, pai ambulatoris specialistics (cardiologjie, onco-logjie, gjinecologjie, diabetologjie, oculistiche, e v.i.). Un prin dât positîf di chestis novitâts al rive par esempli dal personâl: dal procès inviât de Regjon pe mobilitât dai infermîrs, la zone a nord di Udin e je stade tra chês plui atrativis. Ancje diviers primaris a àn decidût di movisi, acetant la gnove sfide. A Glemone in particolâr però i Comitâts a continuin la lôr bataie par difindi il Pront Socors che si dovarès trasformâ intun pont di prin intervent, cussì come che a stan lant indenant cul espost in Procure che al met in lûs i miôr criteris di antisismicitât dal “Sant Michêl” rispiet a ducj chei altris ospedâi de Regjon. Ancje il plan des emergjencis nol plâs trop, cence contâ la storie dal elipuart dentri dal ospedâl che nol ven utilizât dal 118 parcè che nol sarès a norme. ❚
David Zanirato