Sfuei Mensîl Furlan Indipendent
Archivi de Patrie

Judâ insegnant a judâsi: lis ultimis ativitâts di «Aghe dal cîl»

............

Tullio Fabbro al è un volontari che al à vude une grande idee: lâ a insegnâ tai paîs puars li che a son problemis di sut, un sisteme par costruî in dome cinc dîs cistiernis pe aghe de capacitât di 16.000 litris. Si pues judâ il progjet Aghe dal cîl-Agua del cielo cuntun impuart di cualsisedi cifre. Dutis lis specifichis pal viersament lis cjatais sul blog http://www.aghedalcil.blogspot.it o su la pagjine Facebook “Aghe dal cîl – Agua del cielo”.
Ve chi la croniche de ultime fadie, contade propit di Tulio. (Redazion)
Cuatri cistiernis costruidis cu la solidarietât di int semplice, che e lavore e e sparagne, che no si dismentee di ce che e jere e di ce che altre int e patìs inmò ator pal mont. O feveli di cui che al jude la nestre associazion, par esempli chei di Muris in ocasion de sagre dal paîs.
O sin lâts in Argjentine, tal nord, te provincie di Salta, ospits di gnovis gjenerazions di furlans partîts inmò tal lontan 1872 e subit dopo de ultime grande vuere mondiâl, in periodis là che la nestre Patrie e jere siore dome di miserie e di emigrazion.
L’INCUINTRI
E al è stât biel chest incuintri. Dopo tant timp, dome cun cualchi persone aromai in etât o vin fevelât te lenghe mari, ma il spirt, il snait che o vin cjatât tai fantats furlans nassûts in Argjentine nus à permetût di lavorâ cun facilitât e velocitât. O vin cjatât int responsabile che e à lavorât cun gust e volontât. La nestre fortune e à volût cun di plui che doi di chescj a lavorassin cun merit dentri dal Ministeri dai Dirits Umans. Cussì, o vin vût l’onôr di jessi presentâts al Ministri Marianela Cansino e ai siei funzionaris che a àn valutât il progjet Aghedelcîl_Aguadelcielo.
O vin vude la sodisfazion di vêlu viodût aprovât e metût in pratiche te seconde setemane de nestre permanence, costruint la prime cistierne dimostrative par une scuele elementâr che e veve dibisugne di une risierve di aghe te zone di mont dal Comun di Chicoana, a dôs oris di strade de citât di Salta.
IL LAVÔR
Il Ministeri al à dut l’interès a risolvi il probleme de provincie che e je une vore grande ma ancje cun grandis dificoltâts e, savint de nestre propueste, al veve za contatât trê cubiis di muredôrs di trê citadinis diferentis in mût di mandâlis a cognossi il nestri progjet. Cussì, dopo un viaç di plui di 400 km, a son rivâts seneôs di imparâ e – ai 2 di Fevrâr di chest an – o vin tacât il cantîr. O vin lavorât, mangjât, zuiât di cjartis la sere e durmît dûr la gnot, simpri insiemi, ospits de coghe Graciela di origjin andine, e di un om che al gjestive la scuele in chel moment sierade pal periodi di vacance. Si sin cjatâts propit ben, cu la organizazion di Pablo Del Pin e di Fernando Martinis. Te joibe o vin ricevude ancje la visite de Ministre e di Gianfranco Martinis, president dal Fogolâr Furlan di Salta, intant che o jerin impegnâts a tirâ sù lis parêts de cistierne. Sabide ai 7 di Fevrâr, aes 3 dopomisdì, o consegnadis lis clâfs dal lochet de puarte di jentrade de cistierne finide. Si sin saludâts cun strentis lungjis e sintudis, cu la promesse che o varès mandât lis risorsis par paiâ i materiâi di costruzion par altris trê cistiernis di fâ sù, une par ogni comunitât di indulà che i trê gruputs a vignivin. In chestis setemanis di Setembar dal 2015, cun cundizions climatichis plui indicadis, a tacaran i lavôrs sot la coordenazion dal Ministeri che par cheste opare al à incjariât Pablo Del Pin par organizâ dut. Par nô, tant ben che mai!
GRACIIS A MURIS
Cun di plui, par bocje de Ministre Cansino, vie pe conference stampe o vin vude la conferme che il Ministeri al à metût in program di sburtâ il progjet tes zonis là che la sut si fâs simpri plui grivie par vie dai cambis climatics dai ultins agns.
Il prin graciis cumò al va a dute la int di Muris e a chê che e à partecipât ae fieste, che cu la sô solidarietât nus à permetût di realizâ il progjet “Aghe dal cîl” in Argjentine.
Nô o lin indevant cul lavôr, visant che la prossime destinazion e sarà in Ecuador te perifarie de capitâl di Quito. ❚
Tulio Fari

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +