“Ho sabies que…?” (Savevistu che…?) Curiositâts e informazions su Catalogne e Catalan

La Catalogne e je viodude di un grum di minorancis tant che un esempli sflandorôs, e cun reson.
Ma di tant sflandôr no si à di lassâsi inceâ, rivant a pensâ, cu la ande vitimiste dai colonizâts, che o sin noaltris i piês dal mont e la cause dal nestri mâl. In Catalogne a son situazions diferentis di tignî in cont e, cundut che cualchidun no si vise, a son ancje problemis.
1)    La lenghe catalane le fevelin un nûf milions di lôr, tun teritori che al cjape dentri: Catalogne, Paîs Valenzian, Isulis Baleârs, une striche di teritori dongje de Catalogne, ma sot Aragon (Franja de Ponent) e une sot de France (Catalunya Nord), Andore, la citât di L’Alguer in Sardegne. Une difusion demografiche e gjeografiche plui grande di tantis lenghis no minorizadis de Europe (par es. albanês, danês, sloven…): fâ azions che si fondin suntune presince cussì al è tant diviers che no fâlis par une lenghe plui piçule.
2)    Des diviersis zonis là che si fevele, chê dulà che il catalan al somee plui in salût e je la Franja de Ponent, là che al è mancul tutelât! Un paradòs che al à lis sôs resons: al è un teritori rurâl cun mancul imigrazion di altris bandis di Spagne, e al gjolt in mût indiret di tantis misuris par merit de Catalogne (radios, televisions, gjornâi, editorie, prospetive di studiâ tes universitâts catalanis…)
3)    Une politiche linguistiche serie a pro dal catalan si le fâs pal plui in Catalogne e a Andore, tant di mancul tes Isulis Baleârs e tal Paîs Valenzian (e i risultâts si viodin, cul catalan in recession), scuasi nuie sot France e Italie (di fat al è in vie di estinzion).
4)    Ancje in Catalogne e je stade e e je une resistence interne ae planificazion linguistiche, cun academics e inteletuâi che a àn batût e a batin cuintri de normalizazion e di iniziativis che a àn efiets positîfs clârs: lis barufis su la lenghe e su cemût promovile, no lis vin dome nô.
5)    Ancje cuintri de lenghe catalane e je une vuere sporcje che e smicje ae strumentalizazion des varietâts locâls (in particolâr il “valenzian”) no par valorizâlis, ma par debilî dut il sisteme catalan. Pal catalan de Franja de Ponent, il guvier regjonâl di Aragon al è rivât a definîlu “aragonês orientâl”.
6)    Tal secont dopovuere pre Josef Marchet al calcolave il catalan tant che lenghe in grant pericul, cun mancul prospetivis di vite dal furlan: la storie e à cjapât une altre plee.
7)    La politiche spagnole cuintri de lenghe catalane e je une vore plui ative e agressive di chê taliane cuintri dal furlan: in Spagne si viôt che lis lenghis diferentis dal castilian a dan fastidi e si fasiur campagnis contrariis a palês. In Italie, aromai, si fâs fente di nuie e si lasse che a muerin. No si sa ce che al è piês.
8)    Il “nazionalisim” catalan al cjape dentri indreçaments indipendentiscj, ma ancje dome autonomiscj: in gjenar, tai scandais, si declarave di ideis indipendentis il 20-30% de popolazion. I partîts che a metevin la indipendence de Catalogne tai prins ponts dal program a àn vût par agns la maiorance assolude dai vôts, ma a fevelavin di indipendence dome par vê (plui) autonomie. Cu lis evoluzions economichis, politichis e sociâls dai ultins agns e mês, al sarà di viodi se l’indipendentisim al cressarà tal concret, e no dome tes manifestazions.
9)    Il nazionalisim catalan, fûr de regjon de Catalogne, al è debil: tal Paîs Valenzian e tes Isulis Baleârs, par esempli, a son stâts simpri al podê la diestre spagnole o la çampe moderade spagnole.
10)    Magari cussì no ancje i massims responsabii dai partîts nazionaliscj catalans, par agns al guvier regjonâl, (chê che e jere Convergència i Unió) a son stâts protagoniscj di câs di coruzion.
Di là di dut, i catalans a àn cjatât une lôr vie par difindi autonomie, lenghe e identitât, che no je la uniche, buine par ducj. Si scuen cjalâ chei altris, ma il Friûl, par frontâ i siei problemis, al à di cjatâ une vie furlane. ❚
Sandri Carrozzo