Riflession academiche sul rûl des lenghis e des minorancis

Udin si conferme tant che cjase europeane des lenghis ancje a nivel universitari. Il Centri Internazionâl pal Plurilinguisim nol fâs di mancul di clamâ adun linguiscj di dut il continent pal Tierç Colocui Internazionâl sul Plurilinguisim che si davuelzarà online di lunis ai 8 a vinars ai 12 di Novembar. Il titul de cunvigne al sarà “Fenomenologia linguistica, sociale e letteraria del plurilinguismo e politiche delle minoranze linguistiche”, e la pussibilitât di meti in pîts un dialic a distance jenfri plusôrs esperts di nivel globâl e rint ancjemò plui interessant e stimolant il calendari di chest event che ducj a podaran seguî su https://vimeo.com/event/1371558.
«Cheste schirie di incuintris che a colin ogni doi agns – al spieghe il diretôr dal Centri Renato Oniga – e sta deventant une tradizion dal Ateneu, che e marche pardabon il so jessi un riferiment di prin plan pai studis di setôr”. Ancje par chest, a screâ il calendari al sarà il retôr Roberto Pinton, cu la diretore dal Dipartiment di Lenghis, leteraturis, formazion e societât Fabiana Fusco. La relazion di viertidure e sarà dal professôr de Universitât di Zurich, Michele Loporcaro, sul contat linguistic slâf-romanç, e e continuarà cuntun cincuante altris relatôrs, che a vegnin di tantis bandis dal mont (Austrie, Brasîl, Canadà, Cravuazie, Iran, Israêl, Italie, France, Polonie, Russie, Serbie, Slovenie, Slovachie, Spagne, Svuizare e Stâts Unîts).
◆ Ai 11 di Novembar al sarà un incuintri dal Grup di Studi su lis Politichis pe Lenghe là che al puartarà il so salût il president de ARLeF – Agjenzie Regjonâl pe Lenghe Furlane Eros Cisilino e si tignarà une taule taronde, ancje chê online, che e varà par coordenadôr Michele Gazzola, de Universitât dal Ulster di Belfast. ❚