RIFLESSION – 2. Identitât e universalitât inte bibie

2. Cemût ise nassude la idee di une universalitât pussibile?
A nivel storic, mi somee che la prime realizazion di un mût di vivi universalistic e sedi stade cul imperi dai Persians. Prime dai Persians, i Assîrs Babilonês a vevin fat sù imperis che si fondavin su la distruzion di chei altris reams e su la depuartazion des élites vintis. Che si ricuardi par esempli ce che al à fat Nabucodonosor intal 598 prime di Crist. Daspò vê cjapât Jerusalem, al à trasferît in Babilonie plui di 4.000 fameis, l’élite judaiche artesanâl, aristocratiche e sacerdotâl.
Ciro (559-530 p.C.), il grant Re dai Rês, intal 539 p.C. al à realizât il prin imperi universalistic indulà che ducj i popui a podevin continuâ a vê lis lôr formis di guvier, lis lôr tradizions, lis lôr religjons. Adiriture, al a diliberât ducj i depuartâts in Babilonie: par cheste rason, i ebreus lu àn considerât come il Messie di JHWH (Isaie 45,1). Si tratave di un imperi sterminât che al unive la Anatolie, la Palestine, la Sirie, la Assirie e Babilonie, la Medie, la Persie e dutis chês altris regjons fin a la Indie.
Dario I (521-486 p.C.) al à organizât ancjemò miôr l’imperi. Al à fat mioraments intes citâts e soredut al à fat sù gnovis stradis. Al à disvilupât un sisteme postâl eficient. Al à inventât un sisteme unificât di paiament cun bêçs di arint dal pês precîs e garantît. L’aramaic e je deventade la lenghe francje dal  imperi. Si podeve lâ de Palestine fin in Indie cence problemis, parcè che lis stradis a jerin siguris, si dopravin i stes bêçs e si fevelave la stesse lenghe. Si tratave di un vêr “el dorado” pai trafics economics e pe difusion des culturis e dai pinsîrs filosofics e religjôs.
Cemût isal stât pussibil dut chest cambiament? Plui di cualchidun al pense che la ideologjie religjose dai Rês persians e sedi stade une vore impuartante. Ducj i Rês persians, de famee dai Achenemidis, a jerin zoroastrians. Par Zarathustra al esisteve dome un Diu bon (Ahura Mazda) che al scombateve pal ben. Ahura Mazda si incjarnave intal om che al faseve il ben. Ven a stâi, che nol ruvinave la nature, che nol copave lis bestiis a stupit vie e che al sostignive i puars e i debui. L’om persian, e prin di dut il Re dai Rês, al veve di jessi de bande di Diu midiant de purece dal pinsîr (cu la preiere e la contemplazion mistiche), cu la purece de peraule (mediant de onestât e de veretât) e cu la purece de azions che a trasformavin il mont in ben.
A chest proposit Dario al à lassât scrit: “O ai cjatât il mâl e o ai fat di dut par fâ il ben, indulà che la int si copave jo, in gracie di Ahura Mazda, o ai fat in mût che no si copi plui. O ai fat in mût che cui che al veve il podê nol continuàs a robâ e a fâ patî i puars”. (al va indevant) ■
Franc Fari – de Universitât dal Friûl