Sfuei Mensîl Furlan Indipendent
Archivi de Patrie

Ricuart di pre Pauli Varutti

............

Par chei che no àn ben presint la figure di pre Pauli Varut, o publichìn un scrit di pre Michelot che nus conte di lui  (Redazion)
1. Il gno prin incuintri cun pre Pauli:
Cuant che pre Pauli al è rivât in ‘Seminari come animadôr tal 1967 jo o jeri a Cjestelîr a tignî a ments i canais e no si sin incuintrâts. Il prin contat cun lui lu ai vût tai prins agns ’70 che o jeri za predi.
Al jere vignût a San Denêl dulà che o jeri capelan par une riunion. Di fat l’ufizi liturgjic de diocesi e veve organizât incuintris pai laics tes foraniis. Un conferenzîr al jere ancje pre Pauli.
Di cualchi timp lui al veve za tacât a tirâ dongje predis che si cjatavin setemanalmentri a Vasinis. In chê ocasion mi à morosât ancje me e o ai tacât a frecuentâ ogni lunis chest grop di predis. Dopo dal taramot, l’incuintri lu vevin trasferît te cjase di pre Tonin a Glemone.
Par me, chescj incuintris a son stâts di grant aiût: tant il fat di cjatâ predis che in amicizie si condivideve lis esperiencis de vite, de parochie, ma ancje il scuvierzi une leture dal vanzeli cuntun voli su la vite, vite personâl e vite di paîs. A son stâts agns biei, impuartants di formazion, di orientament come predi. A àn impostade la mê vite, mi àn dât elements e dimensions che il ‘Seminari nol veve rivât a dâmi.
2. Midiant di chest grop o ai cjapât contat cuntune altre realtât dal Friûl e de diocesi: chê che e faseve riferiment a pre Checo e ai predis cjargnei.
Cemût Pauli isal jentrât in contat e si isal svicinât a pre Checo? Lu conte lui, Pauli stes, tun intervent te Assemblee dai predis dal 1975. Al dîs:
«O cîr di spiegâus un moment la mê evoluzion su chê robe li (la cuestion furlane, contestade te assemblee di un grop di predis [n.d.r.]). Parcè che capint la evoluzion de anime di un om, si capìs un pôc l’animo des robis e no dome lis ideis.
Alore jo, a dîus il vêr, o ai començât a fâ atenzion a la int midiant un moviment di spiritualitât che si clame “Prado”. Cleric, o lavi in France cun bons. Ancel, che cualchidun di voaltris al à cognossût, e li nus judavin fuart a lei il Vanzeli e dopo sul Vanzeli a viodi cemût che si podeve fâ atenzion a la int…
Li o ai imparât a tornâ a la int e duncje a plombâ te int la teologjie, la spiritualitât e dut. Dopo, cun lôr simpri, o ai imparât a cognossi la int come categorie, come coletivitât, ven a stâi come popul, no la int come persone e vonde. …
Dopo o ai pensât tra di me: “Cjale, il stes discors che jo o sint al Prado e che o fâs dentri di me lu sint a fâ di cualchi predi mat, tant che o volês, balort, che si clame pre Checo e cualchidun dongje di lui”.
O ai començât a cjapâ contat cun lui e o ai viodût che lui e companie mi judavin e meti intal popul furlan chê sensibilitât, chei ategjaments spirituâi di preiere, di amôr, di atenzion a la int, che o vevi imparât tal “Prado”. Chest, ce mi aial permetût di fâ?
Mi à permetût di calâ tal gno popul chês categoriis gjenerichis che i vevi imparât in France, là che o soi stât, e dopo di scomençâ jo a atuâlis, a paiâ di persone».
3. Pre Checo e pre Pauli a son stâts tra i protagoniscj plui ferbints de Assemblee di 40 agns indaûr. La linie di pre Pauli, plui spirituâl e la linie di pre Checo plui culturâl, storiche, etniche… si son incuintradis, amalgamadis e svilupadis tal moviment di Glesie Furlane. Al cîr di fâ in maniere che la fede e cjapi il savôr de nestre tiere, de nestre int, no par imboconâle, ma par scuvierzi i vanzeli te vite, te nestre storie.
4. Tal timp dal taramot, al è sucedût un fat emblematic che al dimostre la fuarte personalitât di pre Pauli. Dopo la seconde grande sdramassade dai 11 di Setembar, a Osôf la int “di là da l’aghe” e bloche la comission parlamentâr rivade in visite te zone taramotade (13-15 di Setembar 1976). «È don Paolo ad interloquire con i parlamentari: “Noi non siamo ribelli, riconosciamo il potere, non quello che ci frega, ma quello che ci serve, e voi politici di destra, di centro e di sinistra, che proprio noi abbiamo votato in mezzo a queste macerie, dovete vergognarvi, voi e i vostri partiti, di quello che ci avete fatto patire». (AAVV. Friuli, un popolo tra le macerie, p. 85, Borla)
5. La grandece di Pauli, la sô spiritualitât profonde le à mostrade dute interie te sô malatie. Su la flôr de vite, inamorât de vite come che al jere lui, al à vude la gracie di acetê e di distacâsi di chest mont cence pierdi la serenitât di fonde, la fiducie tal Signôr. In chest al è stât dal dut diferent di pre Checo che denant de malatie al à vude une reazion dal dut contrarie, almancul esternementri.
6. Ce restial dal sô jessi stât predi e om?
La stesse domande o pues fâle: Ce restial di gno pari, di mê mari? Ce restial di ognidun di nô?
Ce che Pauli al à semenât in nô, te int, in chei che al à cognossût, no si è pierdût. Al reste l’insegnament, l’esempli, la impostazion, la fede come “la robe plui preziose da vite” (Testament), la gole di cognossi il Signôr par cognossi miôr la vite… e chest si lu comuniche, si lu passe a altris e cussì o pensi che nuie si strace, nuie al va pierdût. Come la semence che e mûr par produsi. ❚
pre Roman Michelot

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +