Vinars ai 09 di Otubar a Sant Vît di Feagne e je stade ricuardade la figure di pre Pauli Varut a 30 agns de muart.
Novembar al è il mês dai muarts e ancje noaltris o ricuardìn pre Pauli, ma cun lui ancje ducj chei altris amîs che nus àn lassâts masse adore.
In chest Olme pre Toni lu nomene fasint riferiment al rapuart dai predis in chest e in chel altri mont cu lis lôr comunitâts.
(redazion)
***
La domenie dal bon pastôr mi puarte cul pinsîr ai tancj, masse predis che a son muarts in chescj ultins agns e timps. Il pastôr al è un pont di riferiment pe sô comunitât. Par chel bisugne augurâsi che il predi al coroni une vite virtuose cuntune muart esemplâr.
Mi riferìs al mût di frontâ il mâl e la muart e al testament, chel vêr, là che si viôt trop che il predi al lasse e a di cui che lu lasse. Se al sint la paternitât spirtuâl o se e à plui fuarce la leç ancestrâl dal sanc.
Ma al è impuartant ancje il lûc che il predi al distine di jessi metût pe polse definitive. Une sielte che e palese se il predi al à veramentri sposade la sô comunitât o se invezit al jere dome un vedran in trasfierte. O ài tal cûr la delusion di tantis comunitâts che a àn viodût il lôr plevan a partî come un forest dopo agnorums di vite e di vitis insieme e la comozion di altris pal lôr predi che al varès spietât cun lôr il grant moment.
O ài ancje cualchi câs concret. Come la rabie de int di Vençon cuant che i parincj a son vignûts a puartânus vie il nestri bonsignôr Faustin Lucardi, copât dai todescs fûr dal domo. Il câs dal siôr Santul di Çurçuvint, pre Vigji Zuliani, che al à volût jessi metût tal mieç dal cimitieri, là che ducj a podevin pescjâlu. Ancje pre Leon Quagliaro, dopo 58 agns di fadie e sudôrs, al continue a tignî unîts e cuiets i siei parochians di Montenars. Pre Pauli Varut, nestri grant amì robât a 43 agns, al à volût fâ lis robis come cu va. Stant che di vîf al veve vivût a Vasinis, di muart al à volût stâ cun chei di Bordan. Di fat al è metût come une glogje a ricuardâur a lis paveis e ai avons di Bordan che “la fede e je la robe plui impuartante da la vite”.
Pre Laurinç Milani al è jentrât come priôr di Barbiane ai 6 di dicembar dal 1954. Tal indoman al è dismontât de mont par lâ in comun a comprâsi il toc de sepulture intal lûc che lu vevin confinât e che la int e va ancjemò in pelegrinagjo. Ogni tant o voi cul pinsîr tal cimitieri di Rualp, là che, biel jentrant de bande di Val, e je la puare lapide di un grant predi, pre Zuan Sala, muart dal 1896, unic pastôr restât a vuardeâ un trop bandonât di ducj.
Simpri in Cjargne, mi visi di un predi muart sul scomençâ de mê cariere. Al jere scjaldinôs e la int e spietave che si paràs in sacristie par intissiâlu. Cussì al saltave fûr e al faseve il fisc. Un an, la dì de Cinise, viodint la glesie miege vueide, al à berlât: “Diu vueli che chei che chest an no son a cjapâ la cinise, entri un an a sedin in cinise!”. Fatalitât o volê di Diu, nancje un mês dopo, tornant dal funerâl di un so compagn in Furlanie, al è restât sul asfalt tun brut incident. La int i à displasût ma no masse. Cuant che però a àn viert il testament e a àn let che al voleve jessi soterât tal lôr cimitieri, i zovins a àn fermade la carete funebre dapît de mont e lu àn puartât a spale par oris fint in glesie. E àn capît che la lenghe e diseve une robe e il cûr un’altre.
Jo no sai là che la muart mi brincarà ni cuant. O sai però che a àn di metimi là che in chel moment o sarai pastôr. Cussì, dopo di vê compagnade la mê int tal lûc de veretât, o tornarai piore ancje jo, par spartî cun lôr il stes misteri e la stesse sperance, tune solidarietât sponsâl in vite e in muart. Par che la muart no dividi ce che la vite e à unît.
OLMIS, vol. IV, 09.05.1998
pre Antoni Beline
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +