Ricuardant Arnalt Baracêt

Ai 21 di Lui al è stât un an che Arnalt Baracêt al è mancjât. Dopo de sô esperience parlamentâr Pci dal 1976 al 1987, al à continuât a batisi pai dirits dai furlans, in particolâr pe Universitât dal Friûl, pai programs in lenghe furlane tal palinsest Rai, pe nassite de Assemblee des Provinciis furlanis, bataiis simpri tal non de autonomie e che tai ultins agns al puartave indevant dentri dal Comitât pe Autonomie e il Rilanç dal Friûl. O vin vût l’onôr di ospitâ su lis nestris pagjinis la sô rubriche “Curtis e che si tocjin”: al jere “un dai nestris” al scriveve Dree Venier l’an passât.
Par ricuardâlu a un an de sô muart us riproponìn chest so articul propit sul teme des Provinciis. No coventin coments, baste lei par capî trop di atualitât che a son inmò lis sôs peraulis. Mandi Arnalt.
✒ Christian Romanini
***
A la fin dal mês di Otubar il President Illy al è tornât a proclamâsi in pro de abolizion des Provinciis . Dome – al zonte – no si pues fâlu parcè che la Costituzion de Republiche invezit lis proviôt, adiriture cu la int che e va a votâ ogni cinc ains par elei i Conseis provinciâi. Lui,il governadôr, al ricognòs che al è necessari un Ent di “aree vaste “ che al vadi di là des circoscrizions comunâls,ma i bastarès no vê plui la elezion popolâr dai conseîrs provinciâi e vê tal lôr puest i Sindics dai Comuns.Al è clâr che cun chest obietîf il President triestin de Zonte regjonâl al vûl, di front de int, delegjitimâ e indebolî lis Provinciis di vuê . In particolâr chês furlanis che si sintin simpri di plui rapresentativis dal Friûl e dai furlans. E che il Comitât pe autonomie e il rilanç dal Friûl al propon, cun simpri plui seguit popolâr, che a metin sù une lôr associazion par istituî la Assemblee unitarie dal Friûl. Strade che fin cumò a àn declarât di volê bati i Presidents des Provinciis di Pordenon De Anna e di Udin Strassoldo. Cuintri, fintremai cumò, al è il President Gherghetta di Gurize. Tai fats lis Provinciis unidis dal Friûl, cu la autorevolece de elezion popolâr dai lôr conseis provinciâi, a saressin, di une bande, une fuarte rapresentance unitarie dal nestri popul e, di chê altre, un strument impuartanton di autoguvier dai furlans par realizâ progjets pal disvilup economic, sociâl e culturâl dal Friûl intîr: dal gurizan, al udinês, ae Cjargne, al pordenonês. Par Illy, che al difint a fuart il centralisim triestin e regjonâl, al è di sigûr preferibil un Friûl sparniçât e indebolît in centenârs di Comuns, in desenis di Ater e in trê Provinciis. In cheste logjiche, par esempli, te tratative pal Guvier di Rome, a àn dât doi sotsegretaris, ma ducj i doi di Triest e cussì v.i. ancje su altris cuestions. Al President Illy, che al definìs cence utilitât lis Provinciis, o vûl fâi une domande. Cuant che lui, doi agns indaûr, al jere – al contrari di ce che al dîs vuê – pe istituzion de cuarte Provincie dal Friûl, volevial pardabon la autonomie domandade justementri dai cjargnei o volevial scjassâ ancjemò di plui il Friûl? Par ultin, une domande a chei furlans, come Fantoni, Valduga, Pedronetto che ogni dì,par chest o chel motîf, a disin di jessi contraris ae Assemblee dal Friûl: par câs vêso une altre propueste pussibile par dâ unitât, autorevolece e un strument che al lavori pe cressince dal Friûl intîr? ❚ ✒ Arnalt Baracêt