Confindustrie regjonalizade, ma al è il Friûl che al tire il cjaruç

Complice la crisi che e condure, che e domande sparagns e razionalizazion dai coscj, lis variis  associazions teritoriâls di Confindustrie dal Friûl-VJ – lant daûr a un orientament che al è daûr a fâsi strade ancje a nivel nazionâl – a àn decidût di inviâ un procès di “regjonalizazion” de rapresentance. O ben, pûr mantignint une presince e un inlidrisament sul teritori, ristruturâsi di mût di realizâ “economiis di scjale” (mancul coscj di gjestion e di servizis e, di consecuence, cuotis mancul onerosis pes impresis che a aderissin) e tal stes timp infuartîsi “politichementri”, cuntune vôs uniche e plui fuarte tai rapuarts cul esterni, vâl a dî cu lis istituzions – Regjon in primis -, mont sindicâl, altris associazions, comitâts e v.i.
A fâ di vierzipiste in chest percors, lis associazions teritoriâls di Gurize e di Triest che a àn za butât jù ancje un “memorandum” sui obietîfs dulà rivâ e su lis modalitâts operativis. Il gnûf president di Confindustrie di Udin, Matteo Tonon, za tal so discors di insediament al à rimarcât che la associazion di Palaç Torriani e crôt une vore tal progjet di une Confindustrie regjonâl uniche, e al à fissât in maniere orientative in cuatri agns il tiermin par realizâ chest progjet.
Rivâ insom nol sarà facil. Gurize e Triest, li che la presince industriâl e je – in fin dai fats – relative (plui sot o viodarìn i dâts), si presentaran tant che une realtât uniche, mentri che Pordenon – che tai ultins agns e à sotscrit acuardis plui cun realtâts dal Venit che dal Friûl-VJ – e à une posizion “ibride” e ambizions che a riscjin di fâ deventâ plui dificil un acuardi che al sedi basât su la presince reâl e sul “pês specific” dal setôr industriâl e produtîf tes diviersis provinciis de regjon. E a disturbâ il procès a podaressin contribuî ancje eventuâls tensions tra lis teritoriâls pal rinovament de presidence di Confindustrie regjonâl.
I numars a fevelin clâr. E a disin che – ai 30 di Jugn dal 2013 – lis impresis iscritis aes Cjamaris di Cumierç dal Friûl-VJ a jerin 107.871 (chês ativis a jerin 95.639, il minim storic tai ultins 13 agns: ma chest al è un altri discors) e, di chestis, 52.403 – vâl a dî il 48,5% dal totâl – a jerin posizionadis in provincie di Udin, intant che Pordenon e contave 27.817 impresis (26,5%), Gurize 10.931 (10%) e Triest 16.720 (15%).
Se po dopo o cjapìn tant che riferiment i dâts de ocupazion (ripuartats sul sît de Regjon), o viodìn che tal 2012 – suntun dât assolût pal Friûl-VJ di 507 mil unitâts – i ocupâts in provincie di Udin a jerin 219 mil (vâl a dî cirche il 43,2%), in chê di Gurize 57 mil (pôc plui dal 11,2%), a Triest 90 mil (17,8% cirche) e a Pordenon 140 mil (pôc plui dal 26,6%). Insome, i ordins di grandece a son ben clârs. Cussì come che al è clâr il fat che Udin e à necessitâts ben plui complessis di chês altris provinciis (dome Pordenon si svicine). Se Gurize di fat e à une economie “condizionade” de presince di Fincantieri (no par câs Giuseppe Bono, president dai Industriâi dal Lusinç, i ’ndi è aministradôr delegât), Triest e à carateristichis dutis propriis (dal puart, potenzialitâts mai disfrutadis, ostaç di mil interès contrastants, ae presince de grande Finance, cun Generali sui scûts e industriis multinazionâls tant che Wartsila ex Grandi motori, che il so president Sergio Razeto al vuide Confindustria Trieste…) e Pordenon e à di fâ i conts di une bande cu la dificile coniunture dal setôr dal mobil (Distret de Livence), di chê altre cul “ridimensionament” – ancje tant che efiets sul indot – de presince de multinazionâl svedese Electrolux, vêr motôr de industrie pordenonese tai agns passâts.
Udin, di bande sô, di là de industrie slargjade su dut il teritori (ancje la mont furlane, si ben in periodi di crisi, e je daûr a mostrâ vitalitât), e à però une presince fuarte di ducj chei altris comparts, dal artesanât ae agriculture, al agroalimentâr, al cumierç, al turisim, cence trascurâ la presince dal Ateneu e dai centris di ricercje. Par chest, il ricognossiment di un rûl fuart di Confindustrie Udin dentri de gnove rapresentance regjonâl dai Industriâi e podarès jessi positive par dute la economie provinciâl, massime par valorizâ lis istancis progjetuâls dal teritori (se si rivarà a fâ sisteme cu lis diviersis categoriis), intun moment li che la “Politiche regjonâl” e mostre segnâi di vieridure al confront. Tocjarà fâ valê, cence esitancis e pôris, la fuarce dai numars e des ideis. Il futûr dal Friûl al passe ancje par chi, no stin a dismenteâlu. ❚
Linux