RICETE. Salate di folp e cartufulis

Timp pe preparazion:
10 minûts par preparâ e il timp par lessâ folp e cartufulis
Ingredients par cuatri personis:
1 folp, cartufulis pal stes pês dal folp, ulivis, savôrs, ai, sâl, pevar,
vueli, limon strucât.

SI FÂS CUSSÌ
Cul cjalt e ven voie di mangjâ plats frêts, e nuie di miôr di un plat che al sedi complet de bande dai valôrs nutrizionâi, tant che une salate di folp e cartufulis. Si cjape il folp e lu si nete ben (gjavant il dint dentri dal cjâf e il rostri tal mieç dai tentacui), e si lu resente ben sot la aghe frede. Intant, si metin a lessâ in aghe frede lis cartufulis, cu la scusse (ma ancje miôr cusinâlis al vapôr, bielzà taiadis a tocs). Intune pignate, meti sù aghe cun cualchi fuee di orâr e, cuant che al tache a bulî, cjapâ il folp pal cjâf e imerzi e gjavâ par almancul 3 o 4 voltis i tentacui, par fâju riçotâ, e po dopo butâ dentri dut il folp, lassant cusinâ a flame cuiete e cul tapon (plui o mancul 25 minûts par mieç chilo: al è pront cuant che il piron al jentre facil…).
Intune terine, meti lis cartufulis a tocs, po dopo il folp, ancje chel a tocuts, e une biele grimpade di ulivis. In bande, taiâ fins fins savôrs e ai, e ta un “biberon” o une cjicare, emulsionâ vueli, sûc di limon, sâl e pevar, e doprâ il batût e la cuince par cuinçâ la salate.
Margherita Meggy Timeus