Timp pe preparazion:
une miezorute
Ingredients par cuatri personis:
une coce, un ûf, farine blancje, nole moscjade, scuete fumade gratade, spongje, salvie.
SI FÂS CUSSÌ
I macarons di coce a son plui facii di parecjâ di chel che si pense.
Il segret al è sielzi la cualitât de coce: lis miôr a son chê greche (cun la scusse colôr savalon) o che mantoane (cul le scusse verde scure), che a àn la paste plui farinose, pluitost che chês nostranis, plui agadosis e cun la paste plui granulose. Une volte taiade a tocuts, metiju tal for cjalt, cun tun sfuei di stagnole parsore cussì si cuein e si suin. Une volte cuete la coce e disfredade, si sfracain cul piron o cul sfracaie-patatis, e in une terine si zonte un ûf, farine blancje, une prese di sâl e une idee di nole moscjade. La cuantitât di farine e va regolade a voli, par vê un impast biel penç. Meti le aghe a bulî cun poc sâl, e cuant che e bol, butâ dentri i macarons un a la volte, doprant dôs sedons par fâju ovai da la forme di une ciespe, mai plui di uns 4-5 par volte, che no vadin a rompisi. Cuant che a vegnin su, si gjavin fûr cuntune cjace forade, e si metin in cjalt. Si poin su pal plat, si zonte une biele grimpade di scuete fumade e parsore si zonte spongje brustulide cuntune fuee di salvie (si pues meti ancje un pugnut di ue calabrie, o decorâ il plat cun cualchi amaret pestât). ❚
Margherita Meggy Timeus
RICETE. Macarons di coce
Margherita Meggy Timeus
