Sfuei Mensîl Furlan Indipendent
Archivi de Patrie

Referendum su la Costituzion, si ucin lis armis. Comitâts pal SÌ, ma ancje Sono Speciale Voto NO

............

La riforme costituzionâl judie o copie la autonomie? Il dibatit al è viert e al met cuintri studiôs di dirit, politics e ancje esponents dal sindicât. Cualchidun al pense che il cambiament de Costituzion sburtât di Matteo Renzi al è ce che al covente par vê un Stât plui sclagn e svelt: altris invezit a crodin che al sedi un dissen une vore centralist che al çoncje ogni sovranitât dai teritoris e des comunitâts. L’apontament cul referendum di Otubar al è dut câs decisîf e al à stiçat la formazion di Comitâts dal Sì e dal No.
Par meti muse cuintri muse lis resons di chei che a poin la riforme e di chei che no le puedin viodi nancje in fotografie a son nassudis sul teritori diviersis ocasions di confront: in particolâr in Sale Ajace a Udin a son stâts clamâts a esprimisi doi professôrs universitaris che al rivuart a àn opinions diferentis come il dì e la gnot. Un al è il costituzionalist Leopoldo Coen de Universitât dal Friûl, che al considere la gnove Cjarte come une pussibilitât pe Regjon di otignî parfin gnovis competencis e par chest al à acetat di vuidâ il Comitât pal Sì: di chê altre bande un fisic, Sergio Cecotti, che al à aderît al Comitât dut furlan Sono Speciale Voto NO: lui, che al è stât protagonist di une part de vite aministrative de comunitât furlane tant che president de Regjon e sindic di Udin, al crôt che lis  modifichis ae Costituzion a metin in seri pericul la specialitât dal Friûl-Vignesie Julie e ce che e je stade buine di puartâ ai citadins. «La ricercje e la inovazion, la protezion civîl, i bens culturâi, lis  infrastruturis energjetichis, la previdence integrative e il coordenament de finance publiche a son ducj aspiets – al dîs – che a passaran sot il guvier di Rome. Achì in Friûl fin cumò ju vin simpri tratâts di bessôi, o vint la ultime peraule. Se al ves di vinci il Sì, chest al deventarès impussibil».  Par dimostrâlu, Cecotti al à mostrât un video dulà che il stes Renzi al confesse che un dai siei intindiments principâi al è chel di gjavâ podê aes Regjons.
Coen invezit al pense che «la riforme no cambiarà nuie pes Regjons autonomis, parcè che e pee la sô atuazion ae revision dai lôr Statûts, e il Guvier centrâl al varà di lâ indevant di intese cui nivei periferics. La gnove Costituzion e je duncje stade pensade in rispiet des autonomiis ma par fâ cressi un sisteme plui eficient e trasparent di guvier de publiche aministrazion».
La intese tra guvier e regjon e je però un rebus. Cemût varessie di madressi? In ce maniere ise di intindi? Cecotti al è pessimist sul fat che l’acuardi cun Rome ae fin al podedi puartâ vantaçs al Friûl, se ogni parlamentâr al pues emendâlu: il Pd Francesco Russo inte norme su lis Provinciis al à dineât ce che al veve dit il nestri consei regjonâl, zontant la norme su lis Citâts Metropolitanis, «e figurâsi se i tancj esponents politics che a son cuintri des Regjons speciâls (al fâs i nons di Gianclaudio Bressa, sotsegretari, e dal president de Toscane Enrico Rossi, ndr) nus lassaran decidi di bessôi ce fâ de nestre autonomie».
Par chest, altris costituzionaliscj, par esempli la furlane Elena D’Orlando e il trentin Valerio Toniatti, a stan sburtant par che lis Regjons Autonomis alpinis a cjatin une intese cul guvier prin dal referendum di Otubar, parcè che dopo al podarès jessi masse tart. La D’Orlando in particolâr e à spiegât che lis garanziis pe nestre Regjon no son particolarmentri fuartis, e par meti al sigûr la nestre autonomie al covente movisi prin che il guvier, se al ves di vinci il referendum, al sedi tentât di doprâ la clausule di supremazie che e passe parsore dai teritoris e che e ridimensione une vore lis competencis regjonâls. Scoltant il so alarme, il conseîr regjonâl Claudio Violino al à presentade une mozion ae presidente Serracchiani e il president de Assemblee de Comunitât Linguistiche Furlane Diego Navarria al à prontât un ordin dal dì di presentâ in ducj i Comuns par domandâ che la stesse Serracchiani e pretindi dal Guvier garanziis precisis de tutele dal nestri podê di autoguvier prin di Otubar. ❚
✒ Walter Tomada

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +