Sfuei Mensîl Furlan Indipendent
Archivi de Patrie

Proxima, la vetrine digjitâl par fâ la spese intai borcs de mont furlane

Piero Cargnelutti

Il progjet de Coop Cramârs si è inviât a Resie cun doi ponts di sperimentazion

Inte mont furlane e je rivade “Proxima”, la vetrine digjitâl di prossimitât. Al è il gnûf progjet de cooperative Cramârs di Tumieç, realizât cul contribût di Fondazione Friuli, Intesa Sanpaolo e sostignût des aziendis sanitariis dal Friûl centrâl e ocidentâl. Si trate di un totem speciâl interatîf dotât di schermi cun tecnologjie touch che al permet di comprâ bens e di fâ prenotazions online midiant di un software clâr e une vore intuitîf. L’ûs al è une vore facil, studiât par abitants des zonis internis che cussì a puedin ricevi inte lôr localitât e tal zîr di 24 oris ce che ur covente: al baste selezionâ il prodot o il servizi, la date di consegne previodude, e confermâ l’acuist. La disponibilitât al ritîr te buteghe e ven po notificade vie mail o sms in maniere automatiche. No coventin smartphones, conession a internet e dutis chês tecnologjiis che dispès a limitin lis personis anzianis che no son abituadis a doprâlis. Al baste presentâsi alì de ativitât comerciâl che e ospite Proxima e sotscrivi un abonament mensîl o anuâl: la version base e da acet ae compre di prodots e e previôt il ritîr dal prodot te buteghe, invezit la modalitât premium e permet il dirit ae consegne a domicili, ancje cu la prenotazion di altris servizis che a saran volte par volte personalizâts in funzion de disponibilitât dal comerciant. Lis primis vetrinis digjitâls a son stadis inviadis a Resie, tal detai tal alimentârs Bortolotti di San Zorç, e inte buteghe di paîs di Oseac. Cumò si va indenant, puartantlis ancje in altris buteghis de mont furlane, ma za dal Belumat a son rivadis richiestis a Cramârs di podê vê ancje li chest prodot. Proxima e je la rispueste concrete aes esigjencis saltadis fûr cu la indagjin “Gli ultimi. Forme di welfare comunitario”, puartade indenant di Cramârs in colaborazion cun Melius, dentri dal progjet Innovalp Experiences, finanziade simpri di Fondazione Friuli e di Intesa Sanpaolo.
◆ La ricercje e à fat saltâ fûr la disponibilitât dai gjestôrs des buteghis di prossimitât ae plurifunzionalitât comerciâl e ae inovazion digjitâl par vignî incuintri aes esigjencis dai abitants e dai turiscj: si trate di une cundizion causade de pandemie che e à puartât a tornâ a scuvierzi il sens dal vicinât e i leams cu la comunitât, dant impuartance ai piçui negozis di mont, presidis locâi di vitalitât e socialitât par contrastâ il spopolament dal teritori. «I gjestôr dai piçui negozis – al spieghe Vanni Treu di Cramârs – a àn manifestât la voie di inovâ parcè che a àn ben claris lis lôr potenzialitâts di vendite e di erogazion di servizis. A àn un leam cu la comunitât che si è infuartît intant de pandemie, un element che vuê cun Proxima o podìn valorizâ cence dismenteâ l’aspiet uman». «Cheste iniziative di Cramârs – al zonte Giuseppe Morandini, president di Fondazione Friuli – e rispuint a plen titul al bant par progjets sperimentâi che a puedin contribuî ae atrativitât e al rilanç de mont furlane. L’interès rivât ancje dal Cjadovri par Proxima, al testemonee il sucès dal bant pe mont 2021 che al conte su un fonts di 200 mil euros e che al intint sostignî iniziativis di sisteme, sperimentâls e une vore inovativis, promovudis tes zonis di mont, ven a stâi in 46 Comuns des provinciis di Udin e Pordenon. Ancje in chest câs, la iniziative si poie su la colaborazion de Regjon e sul sostegn di Intesa Sanpaolo». ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +