Sfuei Mensîl Furlan Indipendent
Archivi de Patrie

Previsions pal an gnûf intal mont dal lavôr

............

.

Ce sucedaraial tal 2015 intal mont dal lavôr? Lis robis larano in miôr, in piês o restarano tant che intal 2014? Al è clâr che la sfere di cristal no le à nissun e che nancje la CISL di Udin, che par so cont o stoi daûr dal manifaturîr, e je in stât di dî cun ciertece, vuê par doman, cuale che e sarà la realtât economiche e di vore che o vivarìn dilunc dal an. Ciertis considerazions e previsions, però, la CISL furlane e pues puartâlis indevant, no azardâlis, par vie che e je fuarte de esperience concrete maduride intal lavôr intens cuotidian fat dongje des lavoradoris e dai lavoradôrs e ancje in virtût des analisis e dai aprofondiments che, in maniere periodiche, la CISL teritoriâl e promôf par capî miôr cjapâ il contest e il senari economic e sociâl locâl. Propit su chest mensîl, tancj sindicaliscj une vore impegnâts “in prime linie” intai varis comparts (siderurgjic, dal len, metalmecanic, dai servizis) a àn vût mût di contâ di impresis singulis, di setôrs e di distrets in crisi profonde e ancje, par fortune, di realtâts che a van ben e che fintremai a cressin. Al net des aziendis che a àn sierât parcè che a son falidis o a àn fermade la ativitât, e di chês che a àn ridot za il personâl sestantsi a un nivel inferiôr di faturât, a son ancjemò masse lis realtâts in afan e in crisi. Ancje se i dâts a disin di un miorament lizêr des esportazions, o sin lontans dal recupar di dut ce che in chescj agns al è stât pierdût intai marcjâts forescj di un manifaturîr tant puartât propit pal trafic in esportazion. Simpri intal nestri teritori si son viertis altris busis enormis tant che la crisi dal cumierç e de distribuzion cooperativistiche. Simpri in Friûl il turisim di mont al è in cjadude libare e chel maritim nol va par nuie ben. La Regjon Friûl-VJ, intun cuadri cussì preocupant, e à dut câs savût e podût frontâ e inviâ a soluzion ciertis situazions tant critichis tant che, par esempli, la Electrolux e la Mangiarotti. La Regjon e à prodot ancje un plan su la economie e il manifaturîr, clamât “rilance imprese”, cul intindiment di razionalizâ, rindi plui eficients e meti a sisteme ducj i struments publics e parapublics che in cualchi mût a àn a ce fâ cul mont des impresis. Chest al va ben, ma si à di procedi ancjemò di plui inte strade des riformis, rindint plui bon e mancul dispendiôs dut ce che di public al esist in cheste Regjon. Tornant ae considerazion che la industrie furlane par rilançâsi e à di cjatâ marcjâts forescj, al è di rimarcâ, par esempli, cemût che si imponi une riforme che e semplifichi i numerôs e distacâts ents preponûts ae internazionalizazion des impresis par dâ eficacitât ae lôr azion. Dut chest al è une cundizion necessarie, ma forsit no ancjemò suficiente, par rianimâ in maniere energjiche il manifaturîr e par creâ gnûf lavôr. Par invertî il cicli al coventarès un “shock keinesian” ma, magari cussì no, lis risorsis publichis a disposizion no bastin. I amortizadôrs sociâi, tant che casse integrazion vuadagns ordenarie, straordenarie, in deroghe e i contrats di solidarietât che a tegnin i lavoradôrs ancorâts ae imprese no son eternis. In plui di cualchi situazion, di fat, a stan par esaurîsi. Par tantis lavoradoris e lavoradôrs, duncje, la prospetive e je chê di jessi sostignûts intal redit par un periodi ancje chel dal sigûr a tiermin, ma il lavôr al è pierdût in maniere definitive! E vuê cjatâ une gnove ocupazion al è tant che vinci ae lotarie. ❚
✒ Paolo Mason, Segretari CISL Udin

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +