Premi Merit Furlan a pre Roman Michelot

Dopo dal Premi Epifanie consegnât a pre ‘Sef Cjargnel ai 5 di Zenâr a Tarcint di chest an, un altri nestri amì di al è stât premiât pal so impegn a pro de lenghe e de culture furlanis.
Si trate di pre Roman Michelot, plevan di Vilegnove di San Denêl e di Pignan di Ruvigne, za president e atuâl vicepresident di Patrie dal Friûl (la clape che e burìs fûr il nestri gjornâl) e colone storiche di Glesie Furlane, che ai 3 di Setembar dal 2016 li dal Cjistiel Darcjan, al à ricevût il Premi Merit Furlan rivât ae 33e edizion.
Cun lui a son stâts premiâts ancje il scritôr Roberto Ongaro di Maian, il compositôr Marco Maiero di Tresesin e l’imprenditôr Yvo Federico di Rivis Darcjan.
Tes motivazions che a àn puartât ae consegne dal premi a pre Roman si lei «La sô cognossince de identitât storiche e culturâl dal Friûl lu puarte a jessi chel ‘Pastôr che al à l’odôr des sôs pioris’ come che al à racomandât ancje Pape Francesc, un predi che nol dismentee di jessi om e simpri de bande de sô int; al à scombatût fin di zovin e al scombat in prime linie lis bataiis par dâ dignitât al popul furlan. In lui la ‘cuistion furlane’ no reste un principi ‘astrat’, ma si incjarne te cuotidianitât; pre Romano nol è il predi dal folclôr che al met a puest la cussience cuntune messe par furlan ‘ogni muart di pape’, ma il plevan des messis par furlan, dal cjant liturgjic, de dutrine di paîs di ogni dì: un predi che nol cjacare ‘di furlan’, ma ‘par furlan’». ❚
✒ Christian Romanini