Sfuei Mensîl Furlan Indipendent
Archivi de Patrie

CUINTRISTORIE DAL TARAMOT. Otave pontade. Peraulis e modons

............

La manifestazion dai 26 di Lui e stabilìs che il moviment des tendopolis al è aromai madûr, bon tant di mobilitâ int che di elaborâ strategjiis e programs par so cont, mantignintsi dal dut autonom di partîts e di ogni gjenar di rapresentance istituzionâl.
In Avost, chel che al jere il Coordenament des tendopolis di Glemone al devente un Coordenament dai Paîs taramotâts, slargjantsi a dute la Furlanie scjassade dal Orcolat. Sclaride la sostanziâl autonomie dal moviment, si tache ancje a sanâ la sbregadure cui sindicâts, che si rangjaran a fâsi plasê un rûl subalterni di front ae centralitât dal Coordenament. A part il gjornalut locâl (chel che si clame “venit”) che al continue a ignorâ dal dut lis ativitâts dal Coordenament, chest al è aromai un sogjet politic che di chel no si pues fâ fente di nuie. In Consei regjonâl, il sociâl democratic Lucio Lonza al dîs mont e net, ai 31 di Avost, che lant indenant cussì al nassarà un “partît des tendopolis” in totâl oposizion a ducj i partîts dal arc costituzionâl. E soredut, no si puedin ignorâ lis ocupazions e i volantinaçs dilunc la Tresemane, e il fat che ai politics ur fos simpri plui dificil vignî tes tendopolis a mostrâ la muse.
Chei che a jerin dentri tal Coordenament ti contin che a salvâ la Regjon a son stâts dome i taramots di Setembar. In efiets, dopo de manifestazion dal mês di Lui, a son passâts altris doi mês e il grant probleme de sistemazion invernâl nol è stât frontât. Forsit pardabon la Regjon no viodeve la ore di parâ vie ducj par vê la man plui libare, forsit semplicementri no je rivade adore a fâ lis robis. Il fat al è che, ben prime dai taramots di Setembar, a àn scugnût insediâ di gnûf il comissari straordenari Zamberletti che al veve molade la vore un volte finît il so prin mandât leât ae emergjence di Mai.
Che lis robis no stessin lant ben, e che la int a ’nt ves plens i bregons des cjacaris dai politics, si jere capît ben clâr ai 4 di Setembar, cuant che il Prin Ministri Giulio Andreotti al jere vignût in visite ae zone taramotade. “Che ne sai di noi, Andreotti?” al titolave un volantin dal coordenament dai paîs taramotâts fat pe ocasion, e cheste domande je àn tirade fûr dapardut dulà che si fermave, di Tarcint a di là da la Aghe e dilunc dute la Tresemane. A Glemone al veve di lâ te caserme Goi Pantanali, pe memoreazion dai alpins che li dentri a jerin muarts. Fûr al à cjatade la int invelegnade che i berlave di dut e, pôc dopo il so passaç, e jere rivade la machine dal Arcivescul Battisti. Ancje lui lu spietavin te caserme, ma la int lu ferme e i domande se al vûl lâ dentri cui papavars o restâ alì, cu la int sierade fûr. Lui al smonte e al cjacare cuntun uficiâl di vuardie, proponintsi tant che garant di une delegazion di taramotâts. L’uficiâl al va a cjapâ ordins ma nol torne plui. E alore il Vescul al dîs “e allora non entro nemmeno io”. Finide la celebrazion cui alpins, Andreotti al scjampe pe braide, dopo vê fat taiâ la rêt di cente de caserme, e invezit Battisti al reste difûr cu la int, e al jentre par simpri tal cûr di tancj furlans. Andreotti al va a finî a Osôf e alì no svolin dome porcons e slogans: ancje un modon al svole sul baûl de auto blu. Chest al jere il clime, prin che i taramots a sdrumassin jù dut e a fasessin scjampâ la int aromai cu la schene spacade, cence plui fuarce di fâi cuintri ae disperazion.
A Setembar si sdrume ce che a nol jere lât jù in Mai. Chest al vâl par dut il lavôr fat tai cantîrs de  ANA, cun tante buine volontât e pôc sintiment (viodûts i risultâts), ma al vâl soredut pe capacitât de int di fâsi coragjo e di resisti. Il poç di indulà che a vevin tirade fûr la fuarce par ricjapâsi dopo il taramot dai 6 di Mai, al è aromai vueit di front a un gnove schirie di taramots aes puartis dal Autun. Di chi indenant, il moviment al devente une altre robe: vignint a mancjâ la vite comunitarie, ben planc, in tante int, e tache a passâ la linie dal “ognidun par se”.
E alore, bisugne contâ di une ricostruzion che e à vude la sô Vierte tes tendopolis, tes assembleis, te autogjestion e, come che cualchidun al à dit, te anarchie, ma che dopo si è maduride tal clime dut mudât dal Autun e dal Invier passâts a Lignan, a Grau o cuissà dulà, dopo vê scugnût scjampâ vie e molâ dut. Ma chel biel principi, cul so Istât sfolmenant ancje sot de ploie, al à vût il timp di slontanâ i piês fantasimis (il Belice, la “Grande Udine”) e di segnâ il troi che, ben o mâl, il Friûl al à cjalcjât. ❚
✒ Igor Londero – Autôr di «Pa sopravivence, no pa l’anarchie» Forme di autogestione nel Friuli terremotato: l’esperienza della tendopoli di Godo (Gemona del Friuli)

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +