Un secul disgraciât e taramotât pardabon, il Cuatricent furlan, che si vierç cuntun Concili sfortunât, inmaneât in chel di Cividât tal 1409 e sdrumât tal sanc e te violence dai interès de Curie romane, e che si siere cui Turcs che a corin pal Friûl tal 1499. Jenfri chescj events, magari cussì no, la muart de Patrie, glotude dal Leon di Vignesie tal 1420; la sopression dal Stât Patriarcjâl, firmade tal 1445, e la gafade dal titul antîc di Patriarcje di Grau che al passe a Vignesie tal 1451. E, come se nol bastàs, su chest disastri politic e istituzionâl ancje la Nature e met la sô çate par fâ dam. Come che nus conte la Croniche di Spilimberc (1489), tal 1470, «inte seconde metât di Otubar, e plui di precîs ai disevot, il dì de fieste di Sant Luche, il Tiliment, flum principâl de Patrie, cence prevision e par une bondance di ploie di montane mai viodude prime, si ingruessì tant di jemplâ dut il so jet, vignint fûr pe plane e devastant campagnis e paîs […] e ducj chei che a vioderin chest spetacul lu cjatarin gnûf e maraveôs».
A chest senari bielzà devastant di par se, si zonte ancje il taramot. Anzit, “i taramots”, parcè che si comence adore a tremâ: ai 6 di Setembar dal 1403, ai 22 di Fevrâr dal 1451, ai 3 di Fevrâr dal 1455 e vie par dut il mês di Març dal 1471. Simpri secont la antighe Croniche di Spilimberc, la scosse dal 1451, salacor la plui fuarte di dutis, che in particolâr e à sdrumade crudelmentri cheste biele citat tirade sù secui prime su la diestre dal flum, e varès adiriture vude une durade di cuindis minûts, produsint no dome muarts e distruzion ma une situazion di pôre nere e di disperazion inte int, che no rivave a parâsi di nissune bande. Cussì nus conte il document antîc: «Passade di pôc la miezegnot, un scjas violent al à durât un cuart di ore inte zone dal Spilimberghês, sì che in tancj, no rivant a capî che che al steve sucedint, si son spaventâts».
Come simpri i Furlans a cjatin une lôr vie, straordenarie e une vore personâl, par rispuindi al mâl: e in chest câs la rispueste e je dople, culturâl e di bon vivi. La metât dal ‘400, là che si concentrin i orcolats plui fuarts, e à rapresentât pal nestri popul une specie di riscat: la semence umanistiche e florìs massime in tiere di Patriarcjat. Jenfri il 1445 e il 1455, Vuarneri di Dartigne, Vicjari dal Patriarcje a San Denêl, al fâs madurî une rêt di oficinis libraris che a segnaran par simpri il profîl cetant alt de culture in Friûl e ancje la nassite, tal 1466, di une des primis bibliotechis publichis di Europe, insiorade di manuscrits che in dîs agns di ativitât a jerin stâts copiâts e metûts insiemi di chel straordenari inteletuâl furlan.
E se la culture no bastàs, ve chi une notizie golose: inte liste di un testament copiade di Sâr Everart, nodâr in Udin tal 1451, si cite pe prime volte «unum ferrum ad faciendam aquavitem», ven a stâi un lambic pe sgnape. Come a dî che, se propit il mont nol zire come che al varès, un bon got cui amîs al jude simpri. ❚
✒ Agnul Floramo
DI SCJAS IN SCJAS: I TARAMOTS INTE STORIE FURLANE. Il 1400, un secul disgraciât
Agnul Floramo