Premi Epifania a pre ’Sef Cjargnel, custodi dal cjant patriarcjin

«O ai scomençât a racuei parcè che a jerin daûr a fâ un delit culturâl. A copâ une tradizion che e à nudride la nestre vite spirituâl e comunitarie di fruts, zovins e cristians». Pre Josef Cjargnel, musicolic e plevan a Guart (Davâr), di passe 50 agns al è impegnât a recuperâ e a meti dongje la musiche liturgjiche furlane (v. “Cjant patriarcjin de tradizion orâl” di J. Cjargnel, E. Pellegrino / Glesie Furlane). Par chest impegn, il mês stât al à ricevût il Premi Epifania, istituît tal 1955 de Pro loco di Tarcint e considerât il “Nobel” dal Friûl.
_Ce significhial chest ricognossiment?
«Al vûl dî che cualchidun al à preseât l’interès tal dâ dongje il cjant patriarcjin, espression de tradizion cristiane tipiche des nestris tieris, che e rivave in dute la zone antighe dal patriarcjât di Aquilee».
_Parcè isal cussì impuartant pe nestre comunitât?
«Cence il cjant patriarcjin no si capìs la origjin des vilotis. Une volte la int e sintive musiche dome in glesie, e lis vilotis a vignivin componudis cul stes caratar, il stes andament struturâl, tal ritmi e te armonizazion a plui vôs, che a vevin i cjants di Aquilee».
_Parcè no ’nt vino plui memorie?
«Ciert cjants a jerin jentrâts te anime de int tant che pilastris che a identificavin il teritori. Ma cul Consei Vatican II, cuant che a son jentradis in glesie lis lenghis vivis, si à pensât che la lenghe fevelade chi di nô al jere il talian: in pratiche une trufe. La nestre int e fevelave par furlan. Cussì, butant vie i vecjos cjants latins, a son stadis butadis vie ancje lis melodiis che la int e sintive sôs  che e cjantave a sclopecûr. E je stade une robe dolorose, che o ai sintude su la mê piel».
_Isal otimist pal futûr di chest patrimoni?
«No soi disperât parcè che l’om al pues jessi tant depravât di butâ vie lis robis plui bielis, ma ancje tant brâf di tornâ a recuperâlis. Cualchidun no lu capìs mai, cualchidun lu capìs in ritart e cualchidun subit. Il furlan, par esempli, al veve di scomparî za 50 agns indaûr e invezit al è inmò vîf, a dispiet dal bombardament di altris modei culturâi e linguistics. E chest al è un miracul». ❚
Natascia Gargano