Sfuei Mensîl Furlan Indipendent
Archivi de Patrie

Pre ‘Sef Cjargnel, agnul di biele vôs

............

La grande ereditât umane e culturâl dal predi e musicolic furlan

Ai 30 di Dicembar dal an che al è a pene passât, nus à lassâts pre ‘Sef Cjargnel. Bot e sclop, cence visâ, cence volê disturbâ nissun, come che al jere usât. Om e predi straordenari, bon pastôr di dute la comunitât furlane che al à amât cence risiervis, par une mission umane e religjose puartade indenant dute la vite, cun grande dignitât, competence, sintiment. Nassût a Remanzâs ai 13 di Otubar dal 1940, nomenât predi ai 29 di Jugn dal 1965, a partî dal 1972 al è stât plevan de Plêf di Sante Marie di Guart insiemi a pre Laurinç Dentesano, altre grande persone, sparide cualchi an prime di lui, tal 2015. Cuarante agns insiemi di vite pastorâl inte Val di Guart, di Davâr a Rigulât, predis des parochiis di Mion-Luint, Luvincis e juste apont di Rigulât. L’ultin toc de sô vite pre ‘Sef lu à fat di bessôl, dongje come simpri de sô int che i è lade daûr tant che un trop di pioris al bon pastôr, par ducj i siei 52 agns di sacerdozi.

A Son tantis lis sôs oparis, dal cuotidian aes impresis fûr dal ordenari, che a son deventadis ancje chestis, a fuarce di dai e dai, tal so jessi mugnestri e laboriôs, il so pan cuotidian. In particolâr a son stadis straordenariis la fuarce e la sapience che lu àn mot par no dispierdi la int e il patrimoni siôr des tradizions furlanis, dentri e fûr de glesie. Al è stât lui, cun pre Laurinç, a tornâ a cjapâ il rît antîc des rogazions di Guart, i pelegrinaçs tai santuaris marians di Italie, Austrie, Slovenie, a recuperâ il sît archeologjic e a fondâ il Museu de Plêf. Cetant grande e utile e je stade ancje e massime la sô passion pe musiche, in particolâr pe musiche corâl e cetant impuartantis a son lis sôs ricercjis e i siei studis sui cjants furlans e sui cjants sacris aquileiês de tradizion orâl. Chel cjant clamât patriarchin, o miôr “a la vecje”, che si lu sintive a cjantâ intes glesiis dal Friûl, almancul prime de riforme ceciliane e dal Concili Vatican II.

«O soi cressût cun chei cjants, A son il gno nît», si lei intune interviste dade di pre ‘Sef al “Avvenire” tal 2016. «Il gregorian lu ai discuviert dome in seminari, e daspò de jentrade dal talian inte liturgjie mi soi rindût cont che la tradizion dal patriarchin e sarès sparide». E alore al à tacât, tai prins agns Setante, a zirâ il Friûl cuntun regjistradôr portatil a cassetis e cjarte pentagramade, par cjapâ de vive vôs di cui che lis saveve, centenârs di melodiis e armoniis di un repertori vocâl in vie di estinzion. Di li a son nassudis tantis publicazions, tant che “Canti sacri aquileiesi della tradizione orale”, cu la cure di un studiôs rafinât come Pellegrino Ernetti, saçs come “I repertori liturgici in Carnia e in Friuli” presints tal libri “Il canto patriarchino di tradizione orale”, e regjistrazions tant che il Cd “Cjantis di Glesie dal popul furlan”, cjantât dal Côr Rosas di Mont, di lui direzût e fondât tal an dal taramot in Friûl.

Predi di Glesie Furlane, di simpri al à puartât indevant la bataie pal ricognossiment dal Messâl par furlan e il dirit di preâ in marilenghe. Par chest e tant altri, tal 2016 al à ricevût il Premi Epifanie di Tarcint e la sô mission e je ben evidente ancje inte partecipazion al documentari “Missus” di Massimo Garlatti-Costa, di pôc realizât, che lu ritrai in video pe ultime volte.

di Alessio Screm

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +