Il salût dal “Dreetôr” che al lasse la incarghe
Cul prin numar dal an, us comunichi la novitât che di cumò indevant o moli la direzion dal nestri mensîl La Patrie dal Friûl che e passarà a Erika Adami. La gnove e je za stade anunziade sui media locâi, ma magari no le san i nestris tancj abonâts fûr dal Friûl, in Italie e in Europe, li chel al rive il nestri gjornâl (e ancje di cualchi bande dal rest dal mont).
**Par cui che no le cognòs, Erika e à vût lavorât di redatore in cjâf par la Vita Cattolica li che e à ancje viodût di dôs rivistis impuartantis pal Friûl: la classiche Stele di Nadâl, e une deventade un classic pai fruts tant che Alc&Cè. Duncje la editorie in marilenghe le à mastiade no pôc.
**Daûr de mê decision di lassâ l’impegn no son fats particolârs, dome dôs cumbinazions: une, che dopo trê agns di grant impegn o vevi gole di cjapâmi une polse, e di seconde, cjapâ la ocasion di vê di diretore une gjornaliste brave tant che Erika. Par prionte, la voie di cambiament: al fâs simpri ben un tic di aiar gnûf.
**Lant vie, mi puarti dentri la braùre di jessi stât diretôr di chê che par me e je la testade miôr dal mont: la nestre storiche testade nazionâl furlane.
Ancje par chest o larai indevant a lavorâ pe Patrie, restant tant che colaboradôr.
**Erika e je la seconde diretore pal nestri sfuei dopo Marie Del Fabro, femine dal nestri fondadôr Felix Marchi: a jê i fâs un grant «bon lavôr!».
Dree Venier
