No bastave la partence in chest 2017 a pene tacât di figuris impuartantis pe furlanetât, che ancje Domenico Zannier nus à lassâts, miercus ai 11 di Zenâr, tal ospedâl di Sant Denêl, ae etât di 86 agns.
Predi, poete, scritôr, tradutôr, inteletuâl, critic sensibil e sclet animadôr e promotôr de lenghe, de culture e de identitât furlane, tant che di artist, di predi e a nivel istituzionâl, pre Meni al à fat cetant pe sô int e pe sô tiere, fondant variis realtâts e tignint dongje il popul furlan cun dute la sensibilitât di un om profont, poetic, apassionât e savint.
Nassût a Pontebe ai 31 di Avost dal 1930, ordenât predi tal 1956, la sô ativitât di scritôr le à tacade ben adore intes pagjinis de nestre riviste La Patrie dal Friûl, ae etât di 19 agns, intal stes periodi di cuant che al strenzeve contats cul moviment poetic “Risultive” e cun Gianfranco D’Aronco, che i publicave su Il tesaur lis primis poesiis. Une passion, chê pe scriture, che nol bandonarà mai. Poesiis, prosis, dramis religjôs, poemis storics, par furlan, talian, francês, inglês, traduzions, saçs critics su storie, lenghe, leterature, articui, discors. A son miârs i siei viers e cetantis lis sôs publicazions.
Tra lis tantis ativitâts di pre Meni, e je cetant significative la fondazion – al coreve l’an 1952 -, de Scuele libare dai furlans. Une istituzion pensade e une vore ative par spandi l’insegnament de lenghe e de culture furlane. Une realtât, une scuele che e veve ancje il so periodic: Scune furlane. Tal 1967 cun di plui, insiemi a Mario Argante e Galliano Zof, al à istituît il moviment poetic La Cjarande e curade la omonime antologjie, une racuelte di poesiis in lenghe ladine e furlane. In chest stes periodi, tra il 1959 e il 1963, al è stât ancje tra i ideadôrs dal Festival de cjançon furlane moderne, de Sagre de Vilote, de Sagre dal cjant cristian furlan, dimostrant un ativisim concret, esemplâr, pontant su la partecipazion direte de int, inte creazion di une societât furlane contemporanie. Al è stât ancje, dal 1975 al 1976, diretôr de La Vita Cattolica.
A son tancj i ricognossiments che i son stâts dâts intal cors de so vite. Tra chescj, la candidature al Nobel pe leterature de bande des Universitâts di Innsbruck e di Salisburg, ma no dome: il Premi pe Culture de Presidence dal Consei dai Ministris talian, il premi Campidoglio d’oro, il Nadâl furlan di Buie, il Premi Epifanie di Tarcint, il Cjiscjiel Citât di Udin e la Medaie di arint de Provincie di Udin.
La sô opare e je imense, e cjape dentri cetancj gjenars e formis. Come la creazion di 12 grancj poemis, par un totâl di 48.541 viers, che a screin il gjenar epic storic de leterature furlane. Cetantis ancje lis racueltis poetichis, plui di une desene e di grant formât, e tra chestis: Tal gorc dal soreli, De bande de vite, Vilie Siriane, Viaç infinît, Te sere dai cedris e Cjavei di lûs, la sô ultime publicazion.
Pre Meni Zannier al à dât cetant ancje ae musiche, colaborant cun compositôrs furlans impuartants, tant che Albino Perosa, Olinto Contardo, Giovanni Pigani, Orlando Dipiazza, Oreste Rosso, Gino Michelazzi. Ma ce che forsit si cognòs di plui di lui, intes viestis di parolîr, a son lis peraulis dal bal Scjaraçule maraçule, presint inte racuelte Il Primo libro dei balli di Giorgio Mainerio. No dome, pre Meni al à scrit lis peraulis ancje di altris musichis dal mestri di capele de Glesie di Aquilee: La putta negra e Ungaresca. Cjantadis rindudis famosis a nivel internazionâl di Angelo Branduardi, che lis à metudis insiemi intal disc Futuro antico 2: Sulle orme dei Patriarchi, regjistrât tal Domo di Spilimberc tal 1998, in ocasion de vincjesime edizion dal Festival Folkest.
Saludât di ducj tant che un furlan esemplâr, plen di vite, sapience e dedizion ae cause furlane, intai ultins timps pre Meni Zannier al jere tornât a intervignî ancje su pe politiche, criticant la riforme des UTI come un «tornâ ae Ete di Mieç». ❚
✒ Alessio Screm
_____________________________
Doi esemplis
de art di pre Meni
O ripuartìn la poesie Clàmimi, o Diu che e vierç la sô ultime racuelte Cjavêi di lûs, publicade tal 2014. Si trate di 19 endecasilabis libaris, la sô metriche preferide. La poesie e je une serene riflession su pe vite daspò de muart.
Clàmimi, o Diu, pes steles e pai astris.
Clàmimi, o Diu, difûr dal gno pantan.
Clàmimi al jessi che nol à mai fin.
In puritâz di vite e di lusôr.
Perdonimi i pecjâz che no ju vuèi
e che ‘o socomp di debolece umane,
di atrazion, di plasê, di lustri sium,
jerbe secjade al sut, sidrade in buere.
Chel arbul dret e alt no rivi a jessi
cjamât di nîz e flôrs par fâti un cjant.
Mi scjàssin brames inmortâls di vivi,
sbrišsant in tal amont di ogni esistenze.
Al è cussì che simpri al mûr sorêli
E un neri gorc al segne la sô gnot.
No mûr la Lûš. Si plate a dâti abrač,
là che la vite ‘e à svuel cun ales gnoves
e roses d’àur e arint ‘e puàrtin sanc.
Clàmimi, Diu, ch’o lusi in tal to cûr.
Ch’e sei vite te Vite e jessi in Jessi.
Chi sot invezit, lis famosis peraulis dal bal Scjaraçule maraçule. In origjin, chest bal – atribuît a Giorgio Mainerio – al veve sì lis sôs peraulis, ma a son ladis pierdudis e no risultin intai spartîts origjinâi, datâts 1578. Al à pensât pre Meni a dâi ae musiche un gnûf test, zuiât sul no sense, lis onomatopeis, lis rimis e lis assonancis dal furlan.
Scjaraçule Maraçule la lusigne e la craçule,
la piçule si niçule di polvar a si tacule.
O scjaraçule maraçule cu la rucule e la cocule,
la fantate je une trapule il fantat un trapulon. ❚
✒ A.S.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +