Sfuei Mensîl Furlan Indipendent
Archivi de Patrie

Pre Bepo Marchet, il cjantôr de anime dai furlans

............

Pre Bepo Marchet
Pre Bepo Marchet

Se al è un om che al à savût lei te maniere plui ecletiche la anime platade e mancul cognossude de storie, de art, de culture e de lenghe dal Friûl, si pues dal sigûr individuâ cheste figure in pre Josef “Bepo” Marchet. Predi, insegnant, studiôs, om di letaris, storic e critic de art nassût a Glemone, al è stât jenfri i plui dinamics esponents de culture furlane tornade a nassi daspò de Seconde Vuere Mondiâl. Consacrât tal 1925 a 23 agns, si jere laureât prin in teologjie e daspò in letaris inte Universitât Catoliche di Milan. Il zovin predi al jere inteligjent, masse inteligjent, intun moment dulà che il Fassio nol voleve sintî fevelâ di autonomie: ni di pinsîr, ni di teritori. Ogni tant i scjampave cualchi osservazion masse sclete, e alore tal 1936 Marchet al fo mandât in “mission” di capelan militâr in Abissinie: cussì, par cuietâlu un pôc.

La esperience dut câs no à studât, ma e à rinfuarçade la sô critiche al regjim,
che lu à mandât al confin a Bobbio, dongje Piacenze.
La sô reazion a une ditature che ti cjalcjave dentri principis identitaris cuintri des minorancis e je lade indevant daspò de Liberazion, cuant che al è stât jenfri i prins a dâ forme a un pinsîr autonomist, sedi dal pont di viste culturâl, ispirant il coletîf poetic di Risultive, sedi di chel politic, animant la vôs plene di snait de Patrie dal Friûl, gjornâl fondât e diret adun cul anarchic Felix Marchi. Ma ancje la storie de nestre art e je in debit cun lui: al à dât di fat dignitât ae sculture in len che fin ai siei studis e jere in buine part discognossude. E soredut al à catalogât cun scrupul plui di 800 gleseutis che al à dissegnât a une a une cu la chine, intune opare che e je coventade a fâ resurî tancj di chescj edificis dopo dal taramot. Fondamentâi pe ricercje de coinè de marilenghe a son i Lineamenti di grammatica friulana dal 1952; ma forsit il so lavôr plui famôs e rivoluzionari al è la Cuintristorie dal Friûl (jessût dome dopo la sô muart, tal 1974), leture critiche “in clâf furlane” des vicendis storichis de Patrie. Dal pont di viste stretementri leterari lis sôs Letaris ai furlans a son piçui saçs di scriture argomentative indreçade a varis interlocutôrs imagjinaris.
La muart ai 8 di mai dal 1966 e à çoncjât masse adore une ativitât penze e impuartante. A son passâts 50 agns di cuant che al è mancjât, ma ancje se la sô olme inte culture nostrane e je indelebile, lis istituzions a somein dismenteâsi di lui e no àn inmaneât nissun apontament uficiâl di ricuart.
Brut segnâl: un di chei che a lui
no i plasaressin… ❚
✒ Walter Tomada

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +