Popcorner e il Pop ladin: la musiche che e ten vive une lenghe

O vin cognossût i Popcorner a SUNS Europe di Udin, il festival european des arts performativis in lenghe minoritarie che ogni an al trasforme la citât intune crosere di lenghis e musichis impensabilis. A jerin sul palc dal Teatri Gnûf Giovanni da Udine siet fantats de basse Val di Fassa cu la lôr tiere intor e in bocje une lenghe che pôcs, fûr des Dolomitis, a cognossin. Chi di un pôc ju tornarês a sintî su Radio Onde Furlane, e tai mês che a vegnin ju viodarês a zirâ pal Friûl.
◆ Popcorner: in ladin fassan, Pop al vûl di frut, ma al fâs pensâ ancje al gjenar musicâl (pop, come popolâr). Corner al è il vagabont, chel che no sta fer. Un non che al è za un manifest: zovins de mont che a torzeonin tra lenghis, gjenars e tradizions, e a tornin simpri a cjase.
◆ Il grup al nas tal 2019 dentri di Cianton da Maravea, un progjet musicâl des cooperativis sociâls INOUT de Val di Fassa. Siet components: Sabrina, Mery e Melany aes vôs, Daniele aes tastieris, Gianpaolo ae ghitare, Tommaso ae batarie, Nicolò al bas. Un biel misliçot, dulà che ducj a àn formazions diviersis: cui che al ven dal conservatori, cui dal côr dal borc. Sul palc a vuelin ancje puartâ il costum tradizionâl ladin, reinterpretât e modernizât: la tradizion, par lôr, no je un toc di museu. E je une stofe che si pues simpri tornâ a meti.
◆ Scrivi in ladin no je une robe semplice, ancje par cui che al è cressût cun cheste lenghe. Il ladin standard al esist dome su la cjarte; lôr a fevelin la variante de basse Val di Fassa, e ogni test lu scrivin propit cun cheste variante fasint une sielte precise e lassant un segn impuartant pal avignî de lôr lenghe. «In ladin no esist une peraule par dî felicitât. Si àn di doprâ altris imagjins, altris zîrs di peraulis. E je une lote personâl cuintri dal dizionari.»
◆ Tal Jugn dal 2025 al è saltât fûr “Utar Piata” (voltâ pagjine) il lôr prin album. A SUNS a àn presentât “Melanconia” e “Tie Soreie” devant di plui di mil personis. Al jere il lôr prin grant palc internazionâl, e a àn tignût dûr. Dal festival a son tornâts cu energjiis gnovis e pussibii invîts a festivai europeans, ma ancje une pussibile colaborazion cun Lia Sampai, la cjantante catalane che e à vinçût SUNS, cjapant il premi dal public e de jurie.
◆ A SUNS a àn ancje scoltât, osservât, si son confrontâts. «O vin capît cetantis stradis diferentis che a esistin par tignî vive une lenghe.» L’incuintri cu la realtât furlane ju à stocâts: «tantis someancis, une lenghe siore, une comunitât che e crôt, e la fadie di rivâ ai zovins.» Za in passât a àn sunât in Sardegne cui sarts e in Pulie pe comunitât greghe; chest Invier a àn dividût il palc cu lis Aganes, grup di feminis che al cjante par ladin badiot ma che al lavore soredut in Gjermanie. «Come se no vessin spazi a cjase lôr.»
◆ L’Istât si jemple di events cui Popcorner: tal mês di Avost al festival Il mosaico delle minoranze a Forlì, dopo il Festival Circens Dolomites, là che musiche ladine e çoncolarie si cjatin su lis Dolomitis. Intant a pensin a preparâ un videoclip, une ristampe dal album, e dôs ritiradis di scriture che a fasaran in Val Badie e sul Lâc di Ledro, il puest dal cûr là che a son nassudis lis primis cjançons.
◆ «Se no sin nô zovins a fâlu, cui puedial?» La lenghe ladine lôr le vivin come une robe naturâl. Si fevele cui amîs, in famee, e scrivi cjançons al è vignût sù di bessôl. «Midiant de musiche, che e je un lengaç universâl, tu puedis rivâ a ducj.» A cui che in Friûl al stes ancjemò pensant se al valeve la pene di cjantâ in marilenghe, i Popcorner a disaressin: «Fasilu. Al è amôr pe tô tiere, pe tô storie. Un patrimoni grandissim. No stâ a lassâlu cjapâ polvar.»
◆ Par cognossi di plui la lôr lenghe e la lôr musiche: scoltait “Utar Piata” su dutis lis plateformis digjitâls e stait daûr ai Popcorner su Instagram, o contataitju a popcornerchiveri@gmail.com. Parcè che cjantâ in marilenghe, ancje in Friûl, al è un at di amôr che al merete sostignût. ❚