Profete come vôs critiche
Un podê plui platât e plui pericolôs
Come che al è cambiât il contest socioculturâl e economic fra i nestris vons e nô, cussì si è modificât ancje il podê, che al à spesseât a doprâ par prin chel progrès tecnic e tecnologjic che al à caraterizât il passaç ae contemporaneitât. O varìn duncje un podê plui sofisticât, sbrissot, fin. Plui pericolôs propit pal fat che no si rive a viodilu, plui dificil di combati par vie che nol comparìs e no si rive mai a individuâlu. Se, come che o scrupuli, il podê al scuen esisti, al è plui pericolôs chel che uficialmentri si presente tant che inesistent. In maniere paradossâl, e je plui pericolose la democrazie che no un regjim. Parcè che la democrazie al è facil che e sedi false, cu la cuâl che il regjim al è simpri autentic. E se denant di un tiran mi sint tibiât e sburtât a lotâ, se no ai un tiran o pues ancje iludimi di jessi libar e duncje eliminâ o ridusi il gno impegn di liberazion.
Il gnûf tiran de omologazion
Pasolini al è un dai pôcs che al à capît chestis robis une vore prime, e forsit l’unic che al à descrit cuntune precision tremende i dams religjôs, morâi, culturâi e psicologjics dal gnûf tiran: la omologazion, soredut midiant de television, cui siei prodots orents di banalitât, superficialitât, inmoralitât o, se si à miôr, di amoralitât.
◆ Fevelant de television e de miopie de Glesie, che no à vude esitazion tal consegnâi la réclame dal propri prodot, al dîs: “La Glesie varessie di continuâ a acetâ une television dal gjenar? Ven a stâi, un imprest de culture di masse peât a chel gnûf podê che nol sa plui ce fâ de Glesie? No varessie, invezit, di tacâle cun violence, cun rabie pauline, propit par vie de sô reâl ireligjositât, platade in maniere ciniche sot di un clericalisim che nol dîs nuie?”.
◆ O crôt però che nancje un spirt antivedût come il so nol varès podût imagjinâ che, dopo pôcs agns, il pape le varès doprade come un dai plui grancj imprescj di imagjin e di propagande, finint cussì cul fâ deventâ cence religjon e vueit un mes, tant che chel dal Vanzeli, che al è rude religjon e sostance. In cheste maniere la Glesie, che di simpri si jere presentade tant che ancure di salvece tai moments di plui grande confusion, si è cjatade ancje jê impantanade e impotente tant che chê societât civîl che e varès vût di salvâ.
Inteletuâl, vadì un che al lei in profonditât
Al è dificil, a chest pont, no ricognossii a Pasolini la cualifiche di inteletuâl a titul plen, tant a dî di un che al lei lis robis intus, in profonditât, cence rassegnâsi e cun rabie, a diference di tancj siei coleghis ancje di çampe, che si son contentâts di constatâ la agonie di une civiltât, pronts a firmâ il certificât di muart e a butâsi in studis di “dietrologjie” grancj e inutii.
◆ Difindint cun decision i tibiâts, Pasolini al à sielzude une compagnie politiche e culturâl par solit plui atente aes problematichis ancje materiâls de classe operarie sfrutade. O feveli dal PCI. Ma no vuei jentrâ intun cjamp che no soi avonde competent. O pues dome dî che al à savût tignîsi un so spazi di autonomie e di libertât, che nol permet di catalogâlu e doprâlu come che si varès voie. In merit al PCI, no simpri la enunziazion dai principis rivoluzionaris e je stade compagnade di une testemoneance pratiche limpie, tacant de cuistion de autonomie furlane, tant cjare al prin Pasolini. Duncje, o ai miôr viodi in Pasolini il difensôr de gnove classe di tibiâts: i tibiâts culturâi, aspiet che lu met in sintonie cun don Milani. ❚
