PERSONAÇ STORIC. Dree Maron

Dree Maron (Pordenon 1474 – Rome 1527), di zovin al fo mestri di gramatiche in Vençon e in Glemone. Lis cronichis lu definissin un dai plui innomenâts leterâts dal so timp, tant che a scrivin di lui cun grande amirazion il poete talian Lodovico Ariosto e ancje il storic Pauli Giovio, tal so compendi su lis vitis dai oms plui impuartants de sô ete. Umanist, cjantôr, poete, Maron al fo cussì tant brâf che il cardinâl Ippolito d’Este lu volè inte Cort di Ferrare, e il pape Leon X de’ Medici prime e po dopo Clemente VII a Rome. A disin di lui che al jere straordenari a inventâsi sul moment poesiis par latin in metriche perfete. La straordenarie e rarissime edizion de Hypnerotomachia Poliphili* publicade inte buteghe di Aldo Manuzio intal Dicembar dal 1499, e puarte intal frontespizi un epigram latin firmât di lui. (*romanç alegoric dal 1500 restât famôs, ndr). ❚