Sfuei Mensîl Furlan Indipendent
Archivi de Patrie

LA STORIE – La storie di madone Lisabete, e de lungje presonie patide sot di Fidrì Savorgnan

Diego Navarria

Ai 13 di Fevrâr dal 1389. “Pierute! – e berle Luzie jentrant di buride te cusine dai Manins – Joisus ce robone!” “Ce isal, Luzie? – i rispuint la coghe che e je daûr a curâ il pes – contimi!” “Vuê a buinore Dree Bleon e Nicolau de Portis a àn copât Fidrì Savorgnan biel che al jessive de messe di cuaresime te glesie di S. Stiefin! Sassinât! Cun 35 scurtissadis!” “Po folc – e sacrabolte la vecje coghe – no ai gust de muart di nissun, ma Fidrì se le à meretade!” “Ma, ce dîstu? Propit tu che tu sês stade a servî par agns te cjase dai Savorgnans! Tu lu cognossevis, no mo, Fidrì?”  “Ancje masse, lu cognossevi, chel trist om! Cumò un recuie e vonde!” “Ma, Pierute, jo o ai simpri sintût a fevelâ ben di lui, ancje dal nestri paron, sâr Nicolau Manin.” “Sigûr, il Manin, di cuant che al è rivât di Florence, al è simpri stât dongje dai Savorgnans. Al à bon nâs pai bêçs. Ma ancje lui al sa di ce paste che al jere Fidrì. Dome che al sa vivi.” “Ma ce varessial cumbinât chest Fidrì? Contimi, sù po, tu sâs che jo no feveli ator…” “Luzie, o cognòs avonde la misure de tô lenghe ma tu âs di sintî la mê cjampane, diferente di chei di Udin.”
◆ Pierute si sente e e tache: “Alore, sâr Francesc di Savorgnan, il pari di Fidrì, amì e Vicedominus dal grant patriarcje Marquart, al jere un om just e preseât. Al veve nasât che, dopo de sô muart, a saressin nassudis cuistions tra so fi Fidrì, che al veve vût de prime femine, e la sô seconde femine, Elizabeth di Rissau, che nô o vin simpri clamade madone Lisabete. Lui i voleve une vore ben e je sal mertave. E jere biele ma e veve ancje cjâf, dolce ma cun snait; i veve dât a Francesc altris sîs fîs, doi mascjos e cuatri feminis. Lui al jere sigûr che il so prin fi, Fidrì, seneôs di podê e violent, i varès dât fîl di stuarzi ae madrigne. Alore, par sigurâ l’avignî a Lisabete, al fasè un biel testament, scrit propit dal nestri paron di cumò Nicolau Manin.” “Ma cemût sâstu dutis chestis robis – le ferme Luzie – No jeristu dome coghe li dai Savorgnans?” “O ‘nt sai di plui e dopo ti spieghi parcè – e va dilunc Pierute – Cul test, sâr Francesc al voleve regolâ dut ben: la dote aes fiis, e erêts di dut i trê mascjos. Ma al veve lassât a Lisabete dutis lis viestis, i aurs e lis zoiis e, fin che e viveve, dut ce che al veve a Lumignà, a Varian, e a Cascanan, e il cjistiel di Flavuigne. E al veve dade la incarghe al patriarcje di vuardiâ i dirits de sô amade femine.” “Brâf chel om! – e dîs Luzie – e dopo?” “Cuant che il puar Francesc al murì, al capitâ come che al veve vualmât: une vore di protestis di Fidrì. Fin che al jere Marquart a forin dome lagnancis. Ma, dopo muart il patriarcje e profitant che il gnûf, Filip d’Alençon, nol podeve jentrâ in citât parcè che chei di Udin no volevin vêlu, Fidrì al tacà a maltratâ la madrigne. Ancjemò piês cuant che i doi fîs mascjos di Lisabete, Francesc e Etor, a muririn e, cognossint il fradilastri, a lassarin dut ce che a vevin vût dal pari ae mari Lisabete, ancje i cjistiei di Pinçan e di Zuin.” “Ben fate – e zonte Luzie – e dopo?” “A chel pont, il trist Fidrì no je fâs plui e i met lis mans intor a Lisabete par copâle se no i da la ereditât. Jê no mole e lui si cjol la robe cu la fuarce. Mi visi ben Lisabete che e scjampe dal palaç cu lis fiis e, a pît, e va a parâsi a Colorêt, che chei siôrs a jerin siei amîs.” E Luzie: “Puarine, une siorone cussì, a pît tal pantan…” “Nuie chest. Cuant che Fidrì al ven a savê che Lisabete e jere daûr a partî par domandâ jutori ae regjine di Boemie, pront al mande i siei tirepîts che le cjapin pe strade di Ruvigne e le sierin tal cjistiel di Pinçan. Jê i fâs cuintri ai sbîrs di Fidrì ma chei, cu la fuarce, che i àn ancje sbregade la vieste, le sierin te stanzie plui alte de tor e i dan la clâf a Milion, chel basoâl che tu cognossis ancje tu!” “Joi ce robis, Pierute” “O sai chest parcè il trist Fidrì, recuie, mi à ordenât di lâ a Pinçan a viodi di Lisabete. Siet mês o ai fat ta chel cjistiel, cun chel cjastron di Milion che mi vierzeve la puarte de stanzie di Lisabete dome dôs voltis in dì. Jo i puartavi di mangjâ, i lavavi la robe e o cirivi di consolâle. O jeri la uniche che e fevelave cun jê e di jê o sai dut. Une femine fuarte e di vê rispiet!” “Brave Pierute, ma cemût ise lade a finî?” “Al rivave l’Invier e tal cjistiel al jere un frêt che mai. Sofie, la fie di Lisabete, e sconzure Fidrì di diliberâ sô mari. Chel i rispuint che le molarà dome dopo che e varà firmât la rinunzie ae ereditât. Al mande il so amì e nestri paron Manin a Pinçan par convincile. Lisabete e resist ma, par no murî di frêt – la stanziate e jere cence nuie tai barcons – e cêt e e acete di firmâ.” “Ce ludro ancje il nestri nodâr Manin! – e dîs sot vôs Luzie par no fâsi sintî – Tu mi âs viert i voi.” “E marcomandi, Luzie, ten cuiete la lenghe, eh!”.
◆ Tal doman. “Pierute, – e berle Luzie scaturide – une gnove orende par te!” “Dimi…” “Joi ce robe! I Savorgnans a àn dit ae int che Fidrì lu àn fat copâ Lisabete e il gnûf patriarcje Zuan di Moravie, che le difindeve!” “E alore?” “La marmaie e à cjapât madone Lisabete e doi dal patriarcje e ju àn fats a tocs in place!” Pierute e reste di clap e si sente: “Puare Lisabete. O vevi capît che e jere la çate dal patriarcje Zuan, che al cîr di tignî bot ai Savorgnans, ma jê, puare femine, dal sigûr no jentre tal sassinament di Fidrì. Ce strani. Par solit, tes contis, la triste e je simpri la madrigne. Achì, invezit, il ledrôs al jere il fiastri… O vês finît di patî, madone Lisabete. Recuie.”
◆ Cinc agns dopo, il fi di Fidrì, Tristan di Savorgnan, par svindicâ so pari, cuntun ingjan al coparà il patriarcje Zuan Sobieslaw di Moravie su la puarte dal cjistiel di Udin. ❚

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +