Tal 1077 Siart e l’imperadôr Indrì a jentrin intune Aquilee resuride. Ma la lôr aleance e durarà mancul di un Istât, parcè che il Patriarcje al murirà in Avost
“Ursule, parcè sunial a dopli?”, al domande Stiefin ae femine, finît di molzi. “E je Pasche, sù po!” “O sai che e je Pasche – al dîs Stiefin – ma al è dal cricâ dal dì che a scampanotin e cumò a àn inviât ancje il campanon”. “Tu sês un salvadi! – si sbroche Ursule – Dome tu a Aquilee no tu sâs che chest an a Pasche al sarà, cul nestri patriarcje, ancje l’Imperadôr Indrì!”. “Cui?” al domande Stiefin. “Ben po, il paron di ducj i nestris parons.”
◆ La jentrade a Aquilee la buinore dai 16 di Avrîl dal 1077 e je une emozion grande par Indrì: “O savevi di Aquilee antigone ma in ruvine – al pense – cumò o viôt une citât resuride. Bandieris, standarts, arcs di vert e rosis intune zornade di Vierte e di soreli. Di une bande la corone des monts, di chê altre un aiarin lizêr cul bonodôr dal mâr. Biele tiere!”. Une fulugne di curiôs e jemple lis stradis. Nobii e predis, contadins e marcjadants. ◆ Une varietât di colôrs e lenghis diferentis. Ancje Stiefin e Ursule a spietin. A tachin lis trombis e a rivin l’imperadôr e il patriarcje, a cjaval, un dacîs di chel altri. “Ma – al salte sù Stiefin – l’imperadôr, il paron dai parons, al è un frutât!”. “Tâs – i dîs sotvôs Ursule – mê comari Milie, che e je a servî li des muiniis, mi à contât che nol à nancje 17 agns. E che il nestri patriarcje Siart, todesc come lui ma om madûr, i à fat di segretari in Gjermanie e al à indreçât plui di une volte chel fantaçat decîs e cence scrupui. Sâstu che Indrì i à fat cuintri ancje al pape? Ma chel i à fat sbassâ lis alis e al à scugnût domandâi scuse. Trê dîs in pinitince tal frêt, e dome chê volte i à gjavade la scomuniche.”
◆ “Maestât – al spieghe Siart denant dal cjampanili alt e imponent – chest tor lu à tirât sù 50 agns indaûr, cu lis pieris dal anfiteatri roman, Wolfgang von Treffen, che in Friûl a clamin Popon, un grant patriarcje. Al à ancje metût in sest la basiliche antighe e il palaç.” E Indrì: “Pari riverît, ti confidi che o ai vût un sgrisul. O soi daûr a talpassâ, cui çucui dal gno cjaval, la strade che a àn talpassade i imperadôrs di Rome!”. “Rome e je stade grande – al marche Siart – ma cumò Aquilee e je sedi un lusôr pe fede, sedi une difese fuarte dal Imperi. Impensiti dome che jo, patriarcje, o ai sot di me 18 vescui. Tu viodarâs te basiliche!”.
◆ Di fat Indrì, te tribune di onôr, al è maraveât di chê liturgjie sflandorose. La jentrade e je za un spetacul: daûr di un nûl di incens, si vierç la crôs patriarcjâl a doi braçs, dopo a son siet cjandelîrs, i 50 cjalunis, i abâts, il diacun che al ten adalt il vanzeli antîc di Sant Marc, i 18 vescui sufraganis, di chel di Como a chel di Pole e, par ultin, cul pastorâl di Sant Ermacore, il patriarcje. Ognidun cui siei paraments: dalmatichis e planetis, piviâi e casulis di sede e di aur. Il cjant al jemple lis navadis de glesie mari: “Sigeardo, Patriarcha nostro, pax, vita e salus perpetua” e dopo, par buine gracie: “Henrico, Rege et Imperatore nostro, pax, vita e salus perpetua.” Vie pe liturgjie patriarchine Siart, sentât su la sô catidre tal mieç de abside, al pense al onôr di vê achì l’imperadôr e al afâr che al à fat a judâlu, intant che Indrì al stime che a Pavie, ai 3 di Avrîl, al à fat propite ben a dâi al patriarcje di Aquilee la invistidure di duche dal Friûl.
◆ Prime di tacâ il gustâ di gale, tal palaç patriarcjâl dongje de basiliche, denant dai vescui e dai nobii, il patriarcje al fâs il discors di bon acet al imperadôr, sentât dongje di lui, e chest al ringracie e al alce la tace ae salût di “Siart Duche dal Friûl”. Batimans di ducj, che a capissin che di cumò il patriarcje di Aquilee nol sarà dome vescul e metropolite, ma al varà ancje il podê civîl su la Patrie dal Friûl. Te grande sale, sot dai volts tignûts sù di cinc colonis bocognonis, al ven puartât ogni ben di Diu. E tache la musiche e Siart, sotvôs, si permet un tic di ironie: “Trê dîs te nêf, discolç e vistût di sac ti à tignût il pape…”. “Tu cognossis il gno caratar, no mo? – i rispuint Indrì – lu varès fat a tocs chel maledet… Ma par une volte o soi lât daûr di mê madone Adelaide di Suse. E je stade jê a cumbinâ dut e a sconzurâ sô cusine Matilde di Cjanosse di vierzimi il puarton dal cjistiel. Cussì, chel fals munic di pape mi à gjavade la scomuniche. Lasse che o comedi lis rognis che o ai in Gjermanie e me paiarà, chel osti di un predi!”. E Siart: “Maestât, o sarai cun te. O larìn sù par Vençon e Scluse, e o fevelarai a pro di te a Ratisbone, là che tu clamarâs adun i princips todescs.” “E jo a Nürberg – al zonte Indrì – ti darai ancje la invistidure di marchês de Istrie e margrâf dal Cragn pe tô fedeltât.”
◆ “Ursule, par cui sunie?” al berle Stiefin uçant il falçut. “E je la Madone di Avost, basoâl di om!”. “Lu sai, sacrabolt! Ma a son glons di muart!”. “Ah, vere! Mi soi dismenteade di dîti che a soterin il nestri patriarcje.” “Orpo, e cemût isal muart?”. “Sâstu che al jere lât in Gjermanie cul imperadôr, no mo?”. “Sigûr, cun chel fantat”. “Alore, la badesse di Aquilee Fridegunde, che e je sûr di Siart e che lui i veve regalât lis vilis di Çumpite, Pantianins e Bean, e vai che mai. E i à contât a mê comari Milie che so fradi si jere metût de bande dal imperadôr e in Gjermanie lu veve judât une vore. Chel lu veve fat siôr ancje de Istrie e dal Cragn. Bot e sclop, no i vegnial un gran mâl di cjâf, al da di mat par cualchi zornade e za di trê dîs al è muart tal forest! Cumò lu soterin te basiliche, dongje dal Sant Sepulcri di Jerusalem, come che al veve domandât.” “Puarin – al comente Stiefin – al à strussiât une vore e nol à gjoldût nuie. Cumò a gjoldaran i patriarcjis che a vignaran e, sperìn, forsit alc ancje nô, int furlane. Recuie.” ❚
