I PROTAGONISCJ – Al jere un dai 33 vescui che a condanavin i eretics

Teodôr (Theodorus) al è vescul di Aquilee sù par jù dal 312 al 323. Al è za vescul juste cuant che l’imperadôr Costantin a Milan al da fûr, tal 313, l’ordin di libertât di religjon par ogni citadin, includûts i cristians. Tal zîr di pôcs agns, Teodôr al tire sù une grandiose basiliche di trê aulis insiorade di un paviment maraveôs di mosaic, dut plen di figuris e simbui che a àn, in dì di vuê, tantis interpretazions diferentis. Al è il plui grant de Europe de Ete paleocristiane e declarât, cu la citât, Patrimoni Mondiâl de Umanitât. Un edifici tant grant e biel al testemonee che la comunitât cristiane di Aquilee, ancje se di scuindon, e jere za une vore numerose, fuarte e antighe. E che e veve za i siei martars, scomençant di Ermacore, so prin vescul, mandât di Sant Marc, daûr de tradizion, e benedet di Sant Pieri.
◆ O cjatìn Teodôr, adun cul so diacun Agaton, tal 314 al Concili di Arles, dulà che Costantin al veve clamât dongje 33 vescui cuintri de eresie donatiste. Dopo di cheste uniche date sigure, il so non si cjate dome in dôs scritis par latin sul paviment di mosaic de basiliche. Te aule di misdì: “Feliç tu, Teodôr, che cul jutori di Diu onipotent e dal trop di pioris che ti à afidât, tu âs tirade sù cheste glesie e tu le âs consacrade in mût gloriôs.” Te aule di tramontane la scrite “(THEOD)ORE FELIX HIC CREVISTI HIC FELIX” e fâs intindi la sô incressite spirituâl e te jerarchie de diocesi.
◆ Une vore pocjis lis citazions par un om che nus à lassât un segn fin in dì di vuê: une glesie che e je stade, par disesiet secui, il riferiment principâl dal Patriarcjât di Aquilee, de Patrie dal Friûl e di un biel toc di Europe. ❚
D.N.