I efiets de pandemie intune ricercje
par cure di Cramars e Melius
Paîs che si disvuedin, ativitâts che a sierin, zovins che a scjampin vie. E je cheste la fotografie che si mostre denant dai nestris voi cuant che o pensìn ae mont furlane, no cate lis ecezions di cualchi centri turistic (li che, par altri, al sarès dut un discors di fâ sul mantigniment de identitât origjinarie) e i tentatîfs aromai simpri plui debii e scalembris di rianimazion.
◆ Purpûr, daûr di chei mûrs simpri plui solitaris, si plate ancjemò un cûr che al tuche a fuart, cun indurance: chel de int che e decît di restâ.
Cussì, biel che lis lûs si distudin une daûr di chê altre, cualchidun al met in at la sô forme di resistence e tal stes timp di amôr, tornant a impiâ une sperance par se e par dute la comunitât.
◆ Une sielte dificile, intune tiere lassade masse dispès in bande ma usade al sacrifici, e che propit par chest e fâs respirâ ancjemò la essence dal “jessi di paîs”, cun dutis lis sôs sfumaduris.
◆ La pandemie e à rindût ancjemò plui fuart chest sens di apartignince, sburtant i parons di buteghis e di altris ativitâts a metisi in zûc e a inventâsi formis gnovis di solidarietât e di svicinament aes dibisugnis dai utents. ◆
La tindince e je stade confermade ancje di resint de ricercje “Gli ultimi. Forme di welfare comunitario”, par cure de cooperative “Cramars” di Tumieç, adun cu la imprese sociâl “Melius”, dentri dal progjet “Innovalp Experiences”, cul finanziament e la poie di Intesa Sanpaolo, de Fondazione Friuli, de Aziende sanitarie universitarie Friûl centrâl e de Aziende sanitarie Friûl ocidentâl.
◆ Tal scandai a son stadis cjapadis dentri 52 buteghis di prossimitât (massime alimentârs o butegutis cun bar) des Vals dal Nadison, Dolomitis furlanis, Cjargne, Cjanâl dal Fier e Valcjanâl, massime chês logadis fûr dal centri principâl. A fâle di parone a son soredut lis feminis (il 56% dai titulârs) e la fasse di etât tra i 40 e i 50 agns (43% dal campion).
◆ Vie pe sierade fuarçade, chescj buteghîrs a àn cirût di lâi incuintri ae comunitât cun dute une schirie di servizis: de consegne de spese (60%), cul gjornâl, il pan, il lat e fintremai lis medisinis che a rivin ogni dì tes cjasis (8%), fin a meti a disposizion la rêt wi-fi (10%) o i propris spazis (tant che la “stanziute cu la stuute pes vecjutis”, o “la stanzie sul daûr cu la machinute pal cafè a disposizion di ducj”) pai incuintris dai paisans (22%). Tra lis curiositâts, al è cui che al à fotografât i clients par une racuelte des “musis di un piçul paîs in lockdown”, o pûr chei che si son metûts in vore par garantî il mangjâ cjalt par dut il paîs.
◆ Intal lei il rapuart, si capìs cemût che la vision di chescj “resistents” si fondi su la filosofie dal “crodii ancjemò”, no cate dutis lis dificoltâts, ma cu la cussience che cence une imprese inovative e un rapuart strent cu la comunitât e cui turiscj no si puedi lâ indevant (dome il 2% nol stime necessari ufrî altris servizis).
◆ Il 25% des buteghis, par esempli, al vent prodots dal puest, conseant ancje altris ativitâts locâls e fasint rêt. Tancj di lôr a smirin a deventâ un centri di socializazion, creant events e ocasions par fâ cognossi il teritori, de serade a teme ae visite vuidade, in colaborazion cun volontaris e cun altris realtâts, cence dut câs dismenteâsi dai paisans, massime dai plui vielis. Par prionte, si cîr simpri di plui visibilitât midiant dai sîts internet o dai social, ancje se une buine part e fâs ancjemò calcul sul passaç di peraule.
◆ Par cheste reson, bisugne intivâsi ancje intal cirî e intal domandâ finanziaments publics par podê cirî stradis alternativis, fasint valê la vôs di chei che a saran ancje restâts i ultins, ma che a rapresentin il spirt e la vivarositât di une mont furlane che e ten dûr e che no si rint. ❚
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +