Pasolini nol è in vendite

Come ducj i grancj personaçs des letaris e de culture, Pier Paolo Pasolini al è une vore citât, ma mai avonde let. Nissun furlan al fâs di mancul di nomenâlu, ma pôcs si sfuarçin pardabon di jentrâ intai siei libris fin dapît, massime ta chei – e no saressin cetancj – che a vegnin fûr des esperiencis furlanis. E alore ducj i aniversaris che lu rivuardin a deventin l’ocasion par une retoriche cence cunfins, che e cjape dentri dutis lis categoriis di savis de nestre tiere: ognidun smaneôs di tira il puar Pier Pauli pe gjachete, cumò che a son aromai 40 agns che nol po plui difindisi.
I nostalgjics dal Friûl di une volte, dai biei timps che a forin (il moviment “filologjic”, par intindisi), lu mostrin come icone di une societât che e celebrave i valôrs di une identitât che e vignive di une sclete culture contadine: ma in veretât nuie di plui progressist di lui si è mai jevât in chel periodi sul nestri teritori, tant che la so peraule poetiche no fo valorizade se no di Gianfranco Contini (che propit furlan nol jere) cuant che i Filologjics ancjemò a cjantavin il Friûl “sentinele de Patrie” o a tasevin par pore dal Fassio.
Di chê altre bande, lu vantin come un sigûr lôr von i ortodòs di çampe che no semein però visasi trop che il Partît Comunist al à bandonât a se stès il zovin mestri costrèt a scjampâ a Rome parcè che in Friûl i vevin ducj fat il desert intôr. Ducj si dismentein che daspò de vuere Pasolini al veve crodût – ancje se par pôc – ae prospetive di une fuarte autonomie che lu veve sburtât a aderî al Moviment Popolâr Furlan: ma chês sperancis si jerin daurman mudadis in delusion, parcè che la Dc e jere rivade a meti lis mans ancje su chel zugatul.
La veretât e je che plui lu tirin pe gjachete, plui Pier Pauli si mostre libar. La sô trasformazion in icone no rivarà adore a realizâsi. Parcè che chest om, chest poete, chest inteletuâl al à vût sì un destin tragjic, ma al à lassât daur un pinsîr che no si fâs ridusi aes etichetis che i vegnin sgnacadis parsore. Asistematic e dispès contraditori, forsit, ma in dut e par dut sclet e libar: bon di fevelâ ancjemò a 40 agns de sô muart intune maniere problematiche e anticonformiste tant vivarose che e semee fânus di spieli fer inte confusion de nestre contemporaneitât.
Ciert, par noaltris furlans al varès di jessi impuartant soredut un aniversari pasolinian: 70 agns indaûr, ai 18 di Fevrar dal 1945, e nassè l’Academiuta di lenga furlana. In chei agns al jere un at rivoluzionari, e ancje se chest istitût di lenghe e puisie al à produsût dome cinc numars dal “Stroligùt”, al è stât un moment soversîf e ribel, che intune ete dulà che scrivi par furlan al jere ancjemò proibît, al sclarive che l’adesion a une identitât di popul e scuen peâsi ae pratiche de sô lenghe, fin dal moment plui coragjos de ativitat creative di un om: la puisie. In cheste utopie espressive si svelave il sium pasolinian di un Friûl che al cjatave la sô emancipazion culturâl inte suaze des altris tradizions leteraris des “Piçulis Patriis” d’Europe. A tacâ dai felibriscj provenzâi, cul model di Frederic Mistral rivât parfin ae glorie dal Nobel: ma anche i Grisons, la Catalogne. Il “furlanùt cristiàn di veça salût” al pandeve un’identitât inlidrisade tal passât ma une vore une vore gnove: al deventave “L’aga frescia dal gno paîs” dulà imbeverâsi par tacâ a vivi te gnove ere che si preparave: dulà che il Friûl al podeve jessi libar. Ma la sotanance ae fin e je dure a murî: invezit i çurviei libars a muerin simpri masse adore. ❚
Walter Tomada