Giulia Daici ‘santule’ in Irlande

E je rivade fin in Irlande la musiche di Giulia Daici. Dopo di vê espuartât il cjant in marilenghe ancje fûr de Patrie – par esempli ancje al premi “Bianca d’Aponte”, ricognossiment a nivel talian dedicât al cjantautorat feminîl – sabide ai 28 di Fevrâr la cjantautore di Dartigne si è esibide a Dublin, ospite de cerimonie di inaugurazion dal “Fogolâr Furlan di Irlande”, intitulade “Introduction to Friuli – Flavours and Traditions to discover” (Presentazion dal Friûl – Savôrs e tradizions di discuvierzi) li dal Istitût Talian di Culture, ae presince dal Ambassadôr di Italie in Irlande Giovanni Adorni Braccesi Chiassi e dal President dal Ente Friuli nel Mondo Pietro Pittaro. «O ai vût plasê di rapresentâ la musiche furlane insiemi cul musicist Simone Rizzi e di vê fat scoltâ al public cualchi mê cjançon, cuntun voli di rivuart a chês par furlan che a fasin part dal disc “Tal cîl des Acuilis”, secont classificât aes “Targhis Tenco 2013”» e dîs. Un gnûf Fogolâr duncje (www.fogolarfurlanirlanda.com), il prin di Irlande, nassût – cemût che a contin i fondadôrs – devant di une pinte di Guiness al pub, là che cualchi furlan si cjatave par viodi lis partidis dal Udin. «O sin par cumò une ventine di personis, e o rivìn des provinciis di Udin, Pordenon e Gurize», nus conte la segretarie Silvia Peccol, «pal plui o lavorìn te suaze dai servizis e o vivìn scuasi ducj a Dublin, un pâr a Cork e Belfast». O vin domandât ai gnûfs rivâts inte galassie dai Fogolârs tal mont, presiedûts di Davide Gessi e che a son pal plui zovins under35, cuâl che al fos il lôr obietîf: «O volìn promovi il Friûl in Irlande, cun iniziativis culturâls, turistichis, enogastronomichis e di cooperazion economiche» a spieghin. «L’event di inaugurazion al è la sintesi di ce che nus plasarès svilupâ: al jere un workshop di enologjie e turisim in Friûl, presentât dal Moviment Turisim dal vin Friûl-Vignesie Julie, une mostre multimediâl di cartulinis storichis dal Friûl par cure de Societât Filologjiche Furlane, la esibizion de cjantante Giulia Daici e infin une degustazion di salâts, formadis e vins furlans». E iniziativis pe lenghe? «Dal sigûr nus plasarès contribuî a promovi la lenghe furlane e, par ce che o podarìn, si impegnarìn in chest sens. Par esempli, l’aniversari de muart di Pasolini al podarès jessi un bon pont di dulà partî. Dal sigûr, a son tantis dificoltâts jessint tal forest, là che nol si capìs nancje il talian: al covente un lavôr impuartant di traduzion par rindi a plen il sens de nestre lenghe». Po ben, intant almancul o cjapìn come un bon segnâl la sielte di vê clamât Giulia Daici, artiste no dome furlane ma che e dopre la marilenghe tal sô lavôr. Simpri a proposit di jê, intant che o spietìn il so gnûf lavôr in prevision di vignî fûr pe fin da l’an o dentri dal inizi dal prossim, o podês continuâ a seguîle tal so sît www.giuliadaici.com. E par cui che al jere a Udin ai 8 di Marc e al jere presint, nol sarà facil dismenteâ il conciert de mitiche cjantautore folk americane Joan Baez, te rassegne Calendidonne. Prime di jê, tal palc dal Giovanni da Udine si son esibidis Giulia e la cjantautore furlane Serena Finatti.❚
Natascia Gargano