INTERVISTE – I furlans di Tokyo e il sunôr dai Zûcs

Interviste a Ottaviano Cristofoli,
ideadôr e diretôr dal conciert
che il Fogolâr Furlan al à ufiert par dâ
il bon acet ai confradis impegnâts tes Olimpiadis
La edizion numar 32 dai Zûcs Olimpics, tormentâts de pandemie, e je scomençade a Tokyo cuntun event che al à fat grant scjas e che al à mostrât pardabon cemût che i furlans, cuant che a vuelin, a son bogns di passâ parsore di ducj i ostacui e des dificoltâts. Par dâ il bon acet ai atletis furlans e ancje al rest de patulie taliane, il Fogolâr Furlan di Tokyo – in colaborazion cul Ent Friuli nel Mondo – al à organizât un conciert che pes restrizions anti Covid si è tignût cence public, ma che al è stât sparniçât par dut il mont midiant di internet. Merit dal contribût di tancj sogjets: Regjon Friûl-Vignesie Julie, Turismo Fvg, Comun di Udin, Fondazion Friuli, Coni, Tv Man Union e SimulArte. Ma soredut di un zovin furlan di Tavagnà che al vîf e che al lavore di 12 agns in Gjapon, dulà che al è deventât anime dal Music System Italy-Japan. Si trate di Ottaviano Cristofoli, la prime trombe de Japan Philarmonic Orchestra, un solist e diretôr di orchestre che al è un dai svants che a tegnin alt il non dal Friûl ator pal mont e che pe ocasion al è stât bon di meti in vore un program musicâl di gale: tacant de Fanfare Olimpiche di John Williams, par lâ indevant cun altris tocs di Giovanni Gabrieli, Marco Maiero e, a sierâ, la cjantose “A planc cale il soreli”, l’Ensemble dal Music System al à maraveât i scoltadôrs pe cualitât des sôs esecuzions.
__
Ottaviano, cemût ise nassude la idee?
Za l’an passât al veve di jessi fat chest biel conciert. E veve di jessi une grande fieste, che e veve di tignîsi al Istitût Talian di Culture: a vevin di jessi ospits i atletis e lis rapresentancis sedi sportivis che diplomatichis, ducj in sumis. Purtrop al è sucedût ce che al è sucedût, e lu vevin scancelât, ma chest an lis Olimpiadis si son fatis e alore nus è someât biel rivâ adore a recuperâ cheste biele idee par dâ il benvignût ai atletis. Il dut si è trasformât intune ocasion par promovi il Friûl cu la scuse des Olimpiadis, e a son stadis tantis lis manifestazions di interès pe nestre culture che o cirìn di tignî vive plui che o podìn.
__
Ma cemût vivino alì in Gjapon cheste grande manifestazion?
Disìn che i zûcs a son stâts un argoment incandessent. Si pues dome imagjinâ i bêçs che a son stâts spindûts e l’impat che su la opinion publiche al à vût il no vê il vuadagn in tiermins economics che ducj si jerin figurâts. Une part dai gjaponês e diseve “No stait nancje a insumiâsi di fâ lis Olimpiadis”, chei altris invezit a àn osservât che i bêçs aromai a jerin stâts za spindûts e che ae fin davuelzilis al jere cuasi doverôs. Dut câs, achì al è ancjemò un argoment divisîf. Si è ducj contents parcè che il sport al è biel pai atletis che a puedin batisi e cirî la vitorie, ma il sens di dute la operazion, de sô oportunitât e di ce che al restarà al fâs une vore discuti. L’argoment al è sufiert, e plui di dut al prevâl il marum par vê pierdude une grande ocasion.
__
Dut câs, ce fasêso in chescj dîs: rivaiso a viodi lis garis? Ce esperience ise?
Flavio Parisi, il president dal nestri Fogolâr, al sta curant un podcast dì par dì par fâ capî cemût che la robe si viôt di chenti, ma disìn che inte nestre vite normâl nol cambie propit nuie. Se cualchidun al pense che il Gjapon si fermi par cjalâ lis Olimpiadis, al vûl dî che nol cognòs il Gjapon… Nol è nissun impat su la dimension cuotidiane. Cun di plui, lôr a son confinâts inte citât olimpiche e par nô al è come se lis Olimpiadis a fossin di une altre bande.
__
Trope int tirial dongje il vuestri Fogolâr?
Prin de pandemie i socis atîfs a jerin une ventine ma il virus al à fat sierâ dut e achì di nô nol è stât nissun “libera tutti”. La robe si è smolade, ma no si pues metisi a organizâ iniziativis cun events di riclam. La veretât e je che o stin spietant che il Covid al finissi di fâ dams par fâ la conte e capî cui che al è restât, cui che al è tornât, cui che al è rivât. In chest moment si cjatìn dome online e la stime no je facile.
__
Ma i furlans rivino in Gjapon par restâ? La tô esperience cemût ise stade?
Disìn che jo mi soi cjatât ben e o soi restât, come il president Parisi che al insegne talian te Universitât e al lavore ancje lui tal ambit de musiche insegnant ai cjantants. Chei altris a pontin a restâ magari par un an: ancje jo sul imprin o pensavi cussì, ma o soi chi di 12 agns e o ai metude sù famee. Intai nestris 7 agns di ativitât (Cristofoli al à fondât il Fogolâr di Tokyo cul president Parisi e cul professôr Shinji Yamamoto, grant amì de nestre tiere e de marilenghe, ndr) o vin dut câs viodût un ciert ricambi: la int si sposte une vore. Tokyo e je une metropoli che e à tant di ufrî ma nol è nancje simpri facil adatâsi.
__
Ce dificoltâts sono a vivi in Gjapon? E ce oportunitâts si cjatino?
Culì cui che al rive si cjate di front un mont e un culture dal dut diferents, ancje se a dî il vêr dal pont di viste lavoratîf a son ciertis someancis, de etiche dal lavôr al rispiet des regulis. Al è un paîs che se tu lu capissis, e soredut se tu rispietis lis normis de sô comunitât, al è bon di dâti une sdrume di pussibilitâts massime se tu sês bon di fâ il to lavôr. E di colaborâ, come che o podìn fâ nô cul Friûl, mandant zovins a fâ esperience e organizant robis no facilis come chest conciert che in cussì pôc timp e cun chestis soluzions tecnichis si podeve organizâ dome ca.
__
Un consei par cui che al vûl vignî a cirî fortune a Tokyo?
Se si è ospits, bisugne capî lis regulis rigjidis, il mût di vivi e i costums une vore inlidrisâts di un paîs che al à une tradizion milenarie. Dut câs nol è di pensâ che i gjaponês a sedin sierâts. A son ospitâi e vierts, cun cui che al rive cun umiltât e voie di integrâsi. Se un al vûl vignî ca a imponi la sô maniere di viodi lis robis, par sigûr nol à capît nuie: un paîs cun doi mil agns di storie nol è a disposizion dal ultin rivât. Ma i furlans par solit no àn fastidi a rispietâ lis regulis e a rispietâ chei altris. O sin un piçul popul, ma che dentri al à tantis culturis e tantis lenghis che a àn simpri vivût insiemi cence conflits. ❚