Lis medaiis che nus fasin braurôs

Lis medaiis che nus fasin braurôs
Sul numar passât de “Patrie” Mara Navarria nus veve pandudis lis sôs sperancis di rivâ a puartâ a cjase a Cjarlins une medaie olimpiche a coronament di une cariere di gale. E cussì al è stât. Dopo de delusion dal concors individuâl, te gare a scuadris Mara e chês altris fantatis de scuadre taliane, Federica Isola, Rossella Fiamingo e Alberta Santuccio, a àn rivât a vinci il bronç. Batudis de Estonie in semifinâl, a àn trionfât 23-21 su la Cine intune finâl pal tierç puest une vore plene di emozions. La Italie no rivave a concuistâ une medaie in cheste dissipline di 25 agns.
◆ Un altri bronç al è vignût di Mirko Zanni, pesist di Pordenon che inte categorie dai 67 chilos al è stât bon di rivâ tierç tirant sù 322 chilos, gnûf primât talian. Devant di lui a son rivâts dome il cinês Lijun Chen cun 332 chilos (record olimpic) e il colombian Luis Javier Mosquera Lozano cun 331. Ancje cheste medaie e je storiche pe nazionâl taliane di pesistiche parcè che al jere dal 1984 a Los Angeles che nissun atlete talian al rivave tes primis trê posizions: ma Mirko al à fat cheste imprese, cuntune dediche ae famee (e in particolâr a so nono che nol è plui) che e à fat vignî il grop pe comozion a cetancj sportîfs. ❚
Redazion