Sfuei Mensîl Furlan Indipendent
Archivi de Patrie

OCJO! Capî la economie digjitâl al pues cambianus la vite

Matteo Baldan

A son lis 17 e 58 cuant che a Capaci (Palermo) a sclopin 1.000 chilograms di tritôl sistemâts dentri di fustins, intun gatul di drenament sot de autostrade. Al è il 23 di Mai dal 1992 e a coventin cuasi dôs oris prime che la television, inte edizion straordenarie des 19 e 43, e deti notizie de muart tragjiche dal judiç Giovanni Falcone, de femine Francesca Morvillo e dai agjents di scorte.
◆ A cuasi trê decenis di distance, la informazion e je un flus cence interuzion. Un flum di peraulis, fats, emozions, tons e berlis che ti rive dapardut là che tu sês, sul smartphone. Simpri impiât.
◆ La notizie e devente notifiche. La informazion nus interomp, nus invistìs di un continui. Il telefon, al note Beniamino Pagliaro, gjornalist che in Repubblica si interesse di economie e digjitâl, «al domande la tô atenzion, cun dutis lis sôs fuarcis, fin che no si strache, e fin ae prossime ricjarie ».
◆ Ma ce ise la atenzion? La enciclopedie Treccani e definìs la atenzion tant che un «procès seletîf li che une secuence percetive o rapresentative e assum, inte ativitât mentâl cussiente dal sogjet, un risalt net sul contest là che e je inseride.» Peraulis di mandâ a ment, tant che a scuele: selezion, percezion, rapresentazion, contest.
◆ La sume des interuzions che o sin sometûts e fruçone la nestre atenzion, e la sume dai framents a son oris, zornadis: une vite pierdude daûr robis dibant che no meretaressin di jessi calcoladis.
◆ La vite di une persone e je determinade di cemût che e dirêç la atenzion. Pierdi la atenzion al vûl dî duncje pierdi il control de proprie vite, cemût che al sclarìs Seneca: «Avonde lungje e je la vite e dade cun largjece pe realizazion des robis plui grandis, se e fos dute ben metude a pro; ma cuant che si piert inte dissipazion e inte inerzie, cuant che no si spint par nuie di bon, costrets de ultime dibisugne si inacuarzìn che e je passade cence vênt sintût il passâ.» (De brev. vit., 1, 4).
◆ La atenzion disviade dal telefon nus indûs, cun di plui, a stimâ di vê pôc control sul nestri timp e su la nestre vite: «Si sbreghìn lis viestis cuintri lis dusinte email che o vin di dâur rispueste, o prontìn messaçs zentîi di rispueste automatiche par gjoldisi cualchi ore al mâr, ma dopo o colìn tant che fruts devant dal bombon de notificazion, a controlâ la email dal jetut su la splaze.»
Par tant che editoriâi cults a invidin a pensâ ae “vite reâl”, la disconession e je la rispueste sbaliade.
◆ «La nestre capacitât di jessi distrats e pâr che e disi che o sin agnostics in mert ae domande: ce meretial la nestre atenzion?», al dîs il filosof e american ricercjadôr Matthew Crawford. Sielzi a ce dedicâ atenzion al è duncje il mût par ricjapâ il control des nestris vitis.
◆ “Attenzione!” al è un test vivarôs che al sclarìs cemût che la polverizazion de informazion e à contribuît ae crisi de editorie, intant che i unics a vê vantaçs a son i zigants de atenzion: Google e Facebook. Il libri al è un must par cui che al lavore intal mont de comunicazion e de informazion, e al è conseât a ducj, parcè che «vuê ducj nô o produsìn informazion, in part o ’nt sin protagoniscj, o fasìn notizie sul newsfeed dai nestris amîs, o cjapìn tocs di realtât e ju contìn. No pretindìn di jessi obietîfs, ma o doprìn i stes struments e lis tecnichis che par gjenerazions a son stadis domini esclusîf dai gjornaliscj.» ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +