Sfuei Mensîl Furlan Indipendent
Archivi de Patrie

No sta a contâmi dome chê storie: e la storie dal Friûl si cjante intun Rap

Moira Pezzetta

«O ai cjatât une vore biel fâ une rapade che e partìs di un discors leât ae nestre int intun periodi cuant che al servive dâsi dongje e fâsi coraç». Cusì Dj Tubet nus introdûs No sta a contâmi dome chê storie, la cjançon che e deventarà la sigle uficiâl de fieste de Patrie dal Friûl dai 3 di Avrîl.
Dj Tubet, che o savìn ben nol è dome un grant artist e cjantautôr ma ancje educadôr, al à volût cu la sô cjançon contânus la storie dal Friûl, come che mai prime e jere stade contade: cul rap.
La gnove creazion artistiche di Dj Tubet e à tant che suaze la storie di un soldât in trincee intant de Prime vuere mondiâl. Spietant il gnûf ordin di atac, il soldât al riflet su lis tapis plui impuartantis de storie dal Friûl e duncje e je une riflession su la vuere, su la pâs e su lis propriis lidrîs.
Di brâf educadôr Dj Tubet nus conte che tal fâ chest lavôr pe ARLeF, destinât ancje aes scuelis, al à sielt di doprâ un libri une vore vîf La nestre storie di pre Checo Placerean. «Il libri di pre Checo al è un biel strument pes scuelis, par vie che al è multilengâl (talian, furlan, todesc, sloven e inglês) e duncje al pues trasmeti i valôrs de nestre int e de storie ancje al di fûr des lezion di furlan e ancje a chei di marilenghe divierse. Il discors in chest volum al rive fin ae Prime Vuere mondiâl e mi sint di conseâlu a ducj tant che prin libri di leture su la nestre storie, parcè che al è une vore clâr tal dâ un sens aes epochis e al è siôr di fatarei sui paîs e su la vite furlane».
«In plui di chest libri, o consei di dâi une lete ancje al libri di Tito Maniacco Storia del Friuli che, cence vê pôre di meti bec sul fassisim, su la resistence e su lis zonis libaris, al conte la storie fin al taramot. Un tratât dulà che il protagonist al è il contadin e l’autôr al cîr di meti in lûs la storie dai “cence storie”, fevelant no dome di rivoltis come chê dal 1511 ma ancje di alimentazion, di organizazion agrarie, di emigrazion, di identitât e di lenghe. E Storia del Friuli e je ancje chê di Gian Carlo Menis che al met in lûs i popui e i moviments storics che a àn dât un sburt al formâsi dal popul furlan e al preservâsi de sô autonomie e libertât culturâl».
Dj Tubet nus conte ancje di altris libris che lu àn ispirât te stesure de cjançon e dal video: Storia del Friuli di P.Paschini, Breve storia del Friuli di P.S. Leicht, Compendio di storia friulana di Francesco di Manzano, Il Friuli – una terra e una gente di O.Burelli e infin Storia del friulani di G. Ellero.
La cjançon di Dj Tubet e je acompagnade di Camilla Grossi, in art Milly, une vôs feminîl par fevelâ di pâs in timp di vuere e di chês feminis che a àn combatût par otignî chê stesse pâs.
Dut al è stât inricjît di un filmât, realizât midiant di un concors di ideis inmaneât de ARLeF. Il vincidôr al è il monfalconês Massimo Raccozzi, za cognossût a nivel internazionâl par vê creât videos di artiscj famôs tant che Elisa, il Volo e i nestris Luna e Un Quarto. A concori cun chest grant artist “di cjase” a jerin ancje altris, e no dome furlans, ma ancje puliês, un milanês e un venit.
Raccozzi nus conte la sô sodisfazion par vê vint il concors: «Mi stice il lengaç dal hip hop par contâ la storie dal Friûl e soredut intune prospetive no convenzionâl che e fevele des gnovis gjenerazions doprant il furlan. Dopo il bielissim lavôr che o ai podût fâ cun i Luna e un Quarto e il poete Maurizio Matiuzza su Primo Carnera, chest fortunât incuintri cun Dj Tubet mi entusiasme tant e al conferme la vitalitât de nestre sene culturâl».
Si viodìn a Gardiscje ai 3 di Avrîl par fâ fieste insiemi al bielissim lavôr di chescj doi artiscj e ae Patrie dal Friûl! ❚
✒ Moira Pezzetta

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +